Publiká riba 17 Yanüari 2025
Willemstad – Promé Minister sr. Gilmar Pisas a reuní ku Minister di Hustisia i Seguridat di Hulanda sr. David van Weel.
Minister van Weel tabata akompañá pa sr. Gerard van Ballegooij (directeur Directie Europese en Internationale Aangelegenheden (JenV), sr. Jurriaan Koning (beleidsmedewerker Koninkrijkrelaties en Suriname (JenV)), s. Jeroen van Velzen (woordvoerder minister van Justitie en Veiligheid) i sra. Bo Melchers (senior beleidsmedewerker Vertegenwoordiging van Nederland in Willemstad: VNW).
E bishita tabata unu di kortesia i alabes a hasi uso di e oportunidat pa atendé algun punto di interes komun.
A toka entre otro en breve e puntonan di seguridat na Kòrsou, hubentut, prizon, kriminalidat i kontinuashon di un bon relashon den Reino.
Na final Minister van Weel a indiká ku e ta kontentu ku e bishita i ku e por a tuma nota di tur e puntonan ku a bini dilanti.
E la informá ku e lo tin un bishita na prizon i tambe e sentro di operashon di DRR.
Tambe e la bisa ku e lo ta bèk den luna di yüni próksimo na Kòrsou i ku e ke mantené un bon relashon ku Kòrsou.
Promé Minister sr. Pisas tambe tabata kontentu ku e por a sera konosí ku Minister van Weel i ku nan por a deliberá riba algun punto ku ta di sumo importansia pa ambos pais.
E reunion a kana den un bon esfera.
