Publiká riba 10 Febrüari 2025
Willemstad – Promé Minister sr. Gilmar Pisas a risibí presidente di Korte Supremo di Hulanda sra. Dineke de Groot dia 7 di febrüari 2025.
Sra. de Groot tabata kompañá pa sr. Franklin Hanze. Esaki ta sra. de Groot su di dos bishita serka Promé Minister sr. Pisas.
Korte Supremo di Hulanda ta e korte di mas haltu di Hulanda ku ta atendé kasonan sivil, penal i fiskal i ta e Korte Supremo tambe pa Aruba, Sint Maarten, Boneiru, Saba, Sint Eustatius i Kòrsou. E Korte Supremo ta un hues di kasashon.
E ta evaluá si a apliká lei manera debe ser den un kaso i si tambe a sigui e proseduranan korektamente.
Sra. De Groot ta e presidente di e hunta general i e hunta ehekutivo di e organisashon di Korte Supremo di Hulanda.
Durante di e bishita aki a trata diferente punto manera esun di Lei di Mucha, Lei Hubenil, ‘kinderontvoeringsverdrag’, e ròl i importansia ku Korte Supremo di Hulanda tin den Reino i diferente bishita ku sra. de Groot a hasi na diferente instansia ku ta resortá bou di e Ministerio di Hustisia.
Sra. de Groot a elohiá Kòrsou tambe ku e diferente tratadonan di derechi di mucha ku Kòrsou a implementá den e último añanan.
E kombersashon tabata unu hopi ameno.
