Publiká riba 05 Ougùstùs 2025
Willemstad – Sekretariado di Konseho di Minister ta wak bèk ku satisfakshon riba e promé seshon di ‘onboarding’ pa kolaboradonan di gabinete di e ministernan di Gabinete Pisas III. E onboarding a tuma lugá djárason, 30 di yüli 2025. Durante e reunion informativo i edukativo aki, partisipantenan a risibí un splikashon di funshonamentu di Konseho di Minister i e proseduranan di Sekretariado, pa por sostené e ministernan efektívamente den e proseso di tuma desishon.
Un elemento klave di e seshon tabata splika e proseso di preparashon pa reunionnan di Konseho di Minister. E seshon a atendé espektativanan pa loke ta trata entrega di dokumento, e kordinashon nesesario entre e Sekretariado i e ofisina di e ministernan, i kon pa konhuntamente garantisá un preparashon di kalidat haltu, na tempu i efisiente pa e proseso di tuma desishon di Konseho di Minister.
E seshon a brinda oportunidat pa hasi pregunta na Sekretaris di Konseho di Minister, Cherise Balentin, i Sekretaris suplente, Kristel Hooi, pa aklará e proseduranan vigente. E interakshon i enbolbimentu positivo di e partisipantenan, a kontribuí na un ambiente konstruktivo i un fundeshi fuerte pa mas kolaborashon. E seshon ta nèt na ora mirando ku djárason, 6 di ougùstùs, ta e promé reunion di Konseho di Minister despues di e temporada di resès ku a tuma lugá den luna di yüli.
E seshon di onboarding ta parti di e programa di onboarding integral pa miembronan di gabinete, den kua otro departamentu di gobièrnu tambe lo duna informashon riba tópikonan manera lei konstitushonal, regulashonnan di kontabilidat, e proseso legislativo, relashonnan internashonal i komunikashon. E seshonnan di onboarding aki ta proveé miembronan di gabinete sin un karera anterior den gobièrnu òf ku promé a okupá otro posishonnan den gobièrnu pa adaptá mas fásil den e ambiente di trabou nobo.
