Publiká riba 27 Febrüari 2025
Minister Hato ta manda un mensahe kla ku trafikashon di hende no ta ser tolerá den nos kadena hudisial
WILLEMSTAD – Minister di Hustisia, Shalten Hato, a presentá un proposishon di lei pa oumentá e kastigu pa trafikashon di hende for di 4 aña pa 6 aña di prizòn. E proposishon akí ta bin komo parti di un esfuerso pa kombatí e kriminalidat serio di trafikashon di hende, ku ta un violashon grave di derechonan humano i ta afektá víktimanan na un manera profundo.
Segun Minister Hato, e oumento di kastigu ta nesesario pa manda un mensahe kla ku trafikashon di hende no ta wòrdu tolerá na Kòrsou. E ta un delitu ku ta envolví eksplotashon di ser humano, manera trahamentu forsa, eksplotashon seksual, i abusunan di diferente manera. Ku e proposishon akí, gobièrnu ta reforsá e kapasidat di lei pa enfrentá e tipo di krímen aki.
Ademas di oumentá e durashon di kastigu, e proposishon di lei ta yuda pa reforsá protekshon pa víktimanan. Minister Hato a indiká ku lo tin mas énfasis riba asistensia i sosten pa víktimanan di trafikashon mediante e unidat kontra trafikashon PATH, inkluso ku ayudo legal, kuido sikológiko i protekshon kontra represaya. E proposishon di lei ta keda den linia ku konvenshonnan internashonal kontra trafikashon di hende, ku ta ripará derechonan di víktimanan i pidi medidanan estrikto kontra esakinan ku ta praktiká esaki. Minister Hato a duna énfasis ku Kòrsou mester sigui e standartnan internashonal pa garantisá siguridat i hustisia.
Na fin di dia, e meta di e proposishon di lei akí ta no solamente pa kastigá esnan ku ta kometé trafikashon di hende, pero tambe pa prevení e delitu akí i duna víktimanan e sosten nesesario pa rekonstruí nan bida. Di akuerdo ku Minister di Hustisia, mr. Hato, Gobièrnu ta spera ku e medidanan mas estrikto aki, lo por duna un kontribushon signifikante den lucha kontra trafikashon di hende i pa protehá derechonan di kada ser humano. Awor e proposishon di lei ta den man di Parlamento pa diskushon i aprobashon. Minister Hato tin konfiansa ku lo tin sosten amplio di parlamentarionan tambe, pa e medidanan proponé, konsiderando e importansia di stroba e tipo di kriminalidat aki den nos komunidat.
