Fundashon Mangusá a kuminsá komo un grupo folklóriko kultural fundá pa sra. Beatrix Muzo-Francisco i esposo na aña 1971. E meta tabata pa siña hóbennan di Bándabou, prinsipalmente esunnan di Flip i Santa Martha, historia i bailenan folklóriko. Komo ku e tempu ei tabatin hopi mucha ku no tabata bai skol, e meta a kambia i bira prinsipalmente pa yuda ku desaroyo edukashonal, sosial, kultural i formashon di mucha, hóben i famia. Asina durante di tempu a logra vários proyekto pa e habitantenan di e diferente barionan di Bándabou.
E hóbennan di e proyekto Ban Komuniká tabata guiá pa direktora di e fundashon, sra. Gerda Gosepa. E ekipo ta konsistí di ra. Jahaira Muzo, guiadó di proyekto, Survienneley Servani, lider di e hóbennan di e proyekto Ban Komuniká, i sr. Alvin Inecia (Tio Ali) produktor di e obra ‘Ban Komuniká ku Tula’. Tambe e boluntarionan: sra. Charline Bulo i sra. Nancy Gustina ku ta forma pati di e tim di guia. Miembronan di direktiva di e fundashon: sr. Ceasar Delanooi, sra. Philomena Kelie Ruiter i sr. Edgar Muzo tambe ta forma parti integral di esaki.
E proyekto Ban Komuniká ta un proyekto pa informá i forma hóbennan entre 13 pa 18 aña, ku nfasis riba fortifikashon di e abilidat di komunikashon positivo, komo e yabi pa desaroyo personal i kolektivo. Dos punto prinsipal di enfoke ta: pa e hóben por trese su opinion i pa e hóben por siña buska informashon korekto i forma su propio opinion. Den e kuadro ak1í e hóbennan a bishitá Parlamento i invitá Minister enkargá ku enseñansa pa bin serka nan na nan Sentro Sablika na Phlip.
E hóbennan ku ta forma parti di e proyekto “Ban Komuniká” ta Dignaira Monte, Curshel Monte, Tshaun Djaoen, Adelsenny Djaoen, Angely Scoop, Su-Emmy Rosalia, Shurimar Bonafacia, Jurviendel Bonafacia, Tyshainy Bonafacia, Tiangylie Jansen, Urvienne Streden, Urdy-Ann Streden i Tairickson Hooi.
Minister Sithree van Heydoorn ta masha kontentu ku e bishita na Sentro Sablika na Phlip i a sintié na kas den e ambiente di e Fundashon Mangusá. A la bes Minister a felisitá tur e hóbennan i e lidernan ku e tremendo proyekto Ban Komuniká i priminití e hóbennan di bai hasi su máksimo esfuerso pa e hóbennan por presentá e obra Ban Komuniká ku Tula riba e dianan 1 i 2 yüli awor riba Plasa Brion.
—
KOMUNIKASHON
**Riba e potrètnan por tuma nota di e bishita i presentashon di e obra “Ban Komuniká ku Tula”. Pa mas potrèt por bsihitá: Bishita na Sentro Sablika
