Notisia

Willemstad – Resientemente minister di Enseñansa, Siensia, Kultura i Deporte sr. Sithree van Heydoorn a lansa di forma ofisial e proyekto di mantenshon na skol sekundario Kolegio Alejandro Paula (KAP). Na mes momento a presentá un trapi di emergensia relashoná ku e proyekto Panel Solar fase 2. Lo realisá e proyekto di renobashon di e skol kompleto huntu ku Servisio di Skolnan Públiko, Ministerio di BZK, Stichting Onderhoud Schoolgebouwen (SOS), Project Planners and Designers N.V., BWC B.V., FORMA Consult & Design Group, Prime Structural Engineers N.V. i De Ron Machineshop.

E proyekto Panel Solar fase 2 ta konsistí di pone panel solar riba dak di 5 skol. E skolnan ta e skolnan di fundeshi A. E. Goiloschool, C. M. L. Maduroschool i Skol Chema Maduro/Angela Jessurun; i e skolnan sekundario Scholengemeenschap Otrobanda-Goslinga i Kolegio Alejandro Paula (KAP). Ya a pone panel solar riba dak di A. E. Goiloschool, Skol Chema Maduro/Angela Jessurun i Scholengemeenschap Otrobanda-Goslinga.

Primeramente lo drecha e daknan di skol ku yudansa di e proyekto Mantenshon di Skol (Groot Onderhoud Scholen Curaçao BZK). Despues lo pone e panelnan solar. a motibu di seguridat a traha un trapi di emergensia. Brantwer i Servisio pa Planifikashon Urbano (ROP) a kontrolá i aprobá e trapi akí. E proyekto ta konsistí di renobashon di henter skol, ku eksepshon di e lokalidatnan di ehersisio físiko. Lo renobá e skol den diferente fase, pa asina no stroba e parti logístiko di skol.

Esaki ta mustra ku huntu nos ta sigui traha na adelanto di enseñansa. Minister Van Heydoorn a yama tur e partinan involukrá danki pa nan esfuerso pa sigui traha na benefisio di nos mucha- i hóbennan.

—

KOMUNIKASHON

Pa mas potrèt bishitá: Mantenshon na KAP

MAS NOTISIA

Ministerio konserní: Enseñansa, Siensia, Kultura & Deporte