Notisia

Willemstad – Riba 3 di febrüari 2026, Projectteam Toezicht en Handhaving (PTH) a kita un trailer sin pèrmit di prekario stashoná riba ruta di Karnaval den área di Marchena.

Esaki a sosodé despues ku tim di prekario a informá e doño di e trailer ku e no a registrá pa uso di e parsela konserní. Despues di esaki, tim di prekario a pasa e kaso pa PTH. PTH na su turno a tuma kontakto ku e persona i a dun’é 24 ora pa kita e trailer, si no PTH mes lo laga kit’é riba su gastu.

Mirando ku e doño no a hasi kaso di ni tim di prekario, ni PTH den e tempu konserní, PTH a kita e trailer riba gastu di e doño.

Esaki ta un atvertensia pa tur persona ku ta pará riba ruta di karnaval, pa sòrú di tin pèrmit pa prekario reglá i na man, klá pa ora PTH pasa kontrolá. Tambe, ta hasi un apleashon pa klientenan di prekario mantené nan mes na e pèrmit ku nan a risibí. Violashon di e pèrmit por resultá den revokashon di e pèrmit, i des-alokamentu for di e parsela. Esaki ta enserá tambe ku lo no por haña un pèrmit pa karnaval 2027.

Ban disfrutá di un karnaval ordená i seif.