WILLEMSTAD – Gobièrnu di Kòrsou a risibí djaweps e notisia for di Washington DC ku Ministerio di Finansa na Merka a eksonerá, esta emití un asina yamá “specific license” na benefisio di aktividatnan di Refineria di Kòrsou NV, Curaçao Refinery Utilities BV i Curoil NV. E lisensia akí ta pone ku e kompanianan konserní por sigui desplegá transakshonnan i aktividatnan operashonal pa tene e refineria habrí. Tambe e ta duna partnernan (merikano) interesá dispensashon te ku 15 di yanüari 2020 di e sanshonnan di Merka kontra PDVSA, pa asina nan por hasi negoshi ku e kompanianan di gobièrnu akí.
E eksonerashon ta un paso importante pa tene e refineria operashonal i atraé partnernan nobo den futuro. E sanshonnan di Merka ta forma un barera grandi pa ambos trayekto. Ku e eksonerashon a logra kita temporalmente un parti grandi di e barera akí. Un análisis mas detayá i konkreto di e ‘specific license’ ku a emití awe, mester bai duna klaridat si e lisensia ta yuda evitá tur posibel impedimentu òf ku tin mester di mas previshon. Pronto lo bai tin un konsulta tokante esaki na Washington DC durante un bishita di trabou di Promé Minister Rhuggenaath medio luna di mei.
Gobièrnu, den estrecho kolaborashon ku embahada i Minister Plenipotensiario di Kòrsou na Washington, a bin ta tuma akshon for di aña pasá i a hiba kombersashonnan ku outoridatnan di Merka tokante e situashon na Venezuela, e sanshonnan di Merka i nos interesnan. Alabes a inventarisá otro posibilidatnan pa kolaborashon ku Merka di forma ku esaki ta krea espasio optimal pa protehá interesnan di Kòrsou i en partikular esnan di e refineria i suministrashon di kombustibel.
