Su Mahestat Rei Willem-Alexander a hasi un bishita di trabou kòrtiku na Kòrsou riba djárason 18 di mart. E bishita a tuma lugá despues di su programa na Aruba. Kaminda tabatin selebrashon di kuarenta aña di Status Aparte (1986–2026) i sinkuenta aña di bandera i himno di Aruba (1976–2026).
Na su yegada, alrededor di mitar di shete di atardi, Gobernador Suplente, sra. Ruthsella Jansen i Minister Charles Cooper na nòmber di Gobièrnu di Kòrsou a risbí Rei Willem-Alexander na e base di Guarda Kosta na Hato.
Despues, huntu ku su delegashon, e la bishitá Vittle Art. E delegashon tabata a konsistí di entre otro Su Ekselensia Gobernador Mauritsz de Kort i sekretario di estado pa Asuntunan Interno i Relashonnan di Reino Eric van der Burg. Inisiadó di Vittle Art señor Kris Kierindongo a risibí Rei Willem-Alexander i a duna un splikashon tokante e aktividatnan di e organisashon. Vittle Art ta un konsepto di “storytelling” kreativo i kulinario na Seru Fortuna.
Durante e bishita, Rei Willem-Alexander, huntu ku Gobernador, e sekretario di estado i minister Cooper a diálogá ku diferente siudadano presente. Den un ambiente informal, a papia tokante e tenshonnan polítiko den nos region i e posibel konsekuensianan di esaki pa Kòrsou i pa e region Karibense.
E kombersashonnan a tuma lugá bou di un dak artístiko den e hardin di Vittle Art. Tabatin dos mesa kaminda den grupo chikí por a sinta huntu i interkambiá idea. Mas òf ménos och’or e delegashon a tuma despedida i Rei a siguí, via Hato rumbo pa Hulanda.
Gobièrnu di Kòrsou ta balorá e bishita di e Rei Willem-Alexander i e atenshon pa e konteksto regional den kua Kòrsou ta situá.
