Publiká riba 22 Aprel 2024
WILLEMSTAD – Ta importante pa tur persona tin un pasport bálido, sigur awor ku fakansi di verano ta aserkando i hopi hende lo biaha. Dor di prolongashon di e término di balides di pasport Hulandes na 2014, tin un oumento e aña akí den e kantidat di petishon pa renobashon di pasport ku ta kaduká na 2024. E oumento akí ta kousa tempu di espera mas largu na Kranshi pa por apliká pa pasport i pa e suministradó na Hulanda por manda e dokumentonan Kòrsou. Gabinete di Gobernador di Kòrsou i Kranshi ta konsehá tur residente di Kòrsou ku nashonalidat Hulandes pa kontrolá nan pasport na tempu i si ta nesesario, tuma akshon, pa evitá gastu èkstra i problema pa biaha.
Aplikashon pasport Hulandes
Residentenan ku pasport Hulandes ku ripará ku e dokumento ta kasi kaduká òf a kaduká kaba, mester traha un sita lihé na Kranshi pa un pasport nobo. E dokumento nobo ta kosta NAf. 200,- pa personanan for di 18 aña i NAf. 100.- pa personanan bou di 18 aña. Ta entregá un pasport 3 siman despues di aplikahson.
Pasport di emergensia
Por pidi un pasport di emergensia na departamentu konsular di Gabinete di Gobernador di Kòrsou solamente den kasonan di urgensia berdadero, manera biahe di urgensia médiko. No por pidi pasport di emergensia komo alternativa si no risibí un pasport nobo na tempu. Ta kumpli estriktamente ku e maneho di pasport di urgensia.
Evitá gastu dòbel
Pa bini na remarke pa un pasport di urgensia, mester tin un motibu urgente demostrabel pa biaha i e persona mester kumpli ku algun kondishon èkstra. Ademas mester apliká tambe pa un pasport Hulandes nobo na Kranshi. Pues, ta hasi gastu dòbel: e pasport nobo (NAf. 200,- pa personanan for di 18 aña i NAf. 100.- pa personanan bou di 18 aña) i gastu èkstra pa e pasport di emergensia (NAf. 112,-). Pa evitá esaki, ta konsehá pa kontrolá balides di e pasport Hulandes na tempu.
Responsabilidat propio
Dependiendo di e destinashon di biahe, algun pais por rekerí pa e pasport ta bálido no solamente durante e biahe di ida i di buelta, sino tambe un kantidat di luna despues di regreso for di e biahe. Kada biahero mes ta responsabel pa kontrolá esaki na tempu i pa sigurá ku su pasport ta bálido. Gabinete di Gobernador di Kòrsou i Kranshi no ta responsabel si un biahe no por tuma lugá dor di no risibí e pasport nobo òf un pasport di urgensia na tempu. P’esei ta konsehá pa kumpra ticket di biahe despues ku a risibí e pasport nobo.
