Publiká riba 10 Desèmber 2024
Willemstad – Servisio pa Planifikashon Urbano (ROP) i tim multidisiplinario di Prekario Karnaval, ta rekordá komunidat ku su ofisina ta habri. Tur kliente mester registrá i paga pa nan atendé nan pèrmit di prekario pa pone stènt òf stelage riba ruta di Karnaval 2025 promé ku 20 desèmber2024.
Registrashon:
Sita personal
Mester traha un sita pa pasa na ofisina. E ofisina di ROP ta keda na Plasa Horacio Hoyer 19 i por skohe un fecha pa sita ku lo ta entre 1.30 pa 4or di mèrdia. Tur kliente eksistente por subi e siguiente link pa traha un sita: https://www.prekariocuracao.com/sita.
Tim di Prekario ta indiká ku solamente personanan ku ta registrá anteriormente komo promé riba e pèrmit, por bini na ofisina pa hasi registrashon òf e persona outorisá. Na momentu ku e kliente tin ku bin pa su sita, e mester bin ku sedula bálido pa por identifiká su mes.
Tur kliente mester ta inskribí na Kòrsou, pa por registrá pa nan derechi di prekario. Ta importante pa tur kliente eksistente lesa nan kondishon di nan permit. E pèrmit otorgá ta personal, no-separabel, no-transferibel, i no transmitibel.
Lista di espera
Tur persona, ku no ta kliente eksistente, i ta deseá na risibí un espasio pa ubiká su mes riba ruta di karnaval, por subi riba e lista di espera. E lista di espera aki su link ta habri i último dia pa registrá ta 20 desèmber 2024. https://prekariocuracao.com/requestprekario
Derechi di prekario pèrdí
Tur kliente eksistente mester a kumpli ku reglanan stipulá den e pèrmit di prekario na momentu di kita stelage despues di Karnaval 2024. Pa Karnaval 2024, e fecha pa kita stelage tabata 18 di febrüari 2024 promé ku 3or di atardi. Dado kaso ku e kliente no a kumpli ku e obligashon aki, e persona a risibí un yamada i un karta pa inform’é ku el a pèrdè su derechi di prekario.
Tim di Prekario pa Karnaval 2024 ta gradesí adelantá pa e koperashon. Ofisina di Tim di Prekario Karnaval 2025 ta alkansabel vía e numbernan 433-3221 i 511-3874. E number 511-3874 ta alkansabel vía di WhatsApp tambe. Por tuma kontakto ku e tim vía di mail na info@prekariocuracao.com.
