Publiká riba 16 Yanüari 2026
WILLEMSTAD – Gobièrnu di Kòrsou a tuma nota di informashon tokante e sédula nobo ku resientemente a keda distribuí a traves di vários medio di komunikashon, pero no a originá for di e kanalnan di komunikashon ofisial di Gobièrnu.
Konsekuentemente, Gobièrnu ta konsiderá nesesario pa emití un korekshon pa loke ta trata e reglamentu nobo di e sédula di Kòrsou pa asina eliminá inklaridat i mal interpretashon bou di tur hende den komunidat.
E reglamentu en kuestion ta introdusí un modelo nobo pa e sédula di Kòrsou. E ta remplasá e modelo eksistente komo ku esun akí ta referí ainda na “Antia Hulandes”, kual ta un entidat konstitushonal ku no ta eksistí mas.
E sédula nobo ta kumpli kompletamente ku e posishon konstitushonal aktual di Kòrsou i ta ekipá ku karakterístikanan di seguridat moderno.
Bou di kondishonnan spesífiko, e sédula nobo por wòrdu usá pa biahamentu denter di e parti Karibense di Reino Hulandes. No a tuma ningun desishon indikando ku e sédula tambe ta bálido pa biahamentu den henter Reino. Kualke informashon ku ta sugerí lo kontrario, ta pues inkorekto.
Publikashonnan anterior a kondusí na diferente interpretashon di e reglamentu. Ku e korekshon akí, Gobièrnu di Kòrsou tin komo meta pa aklará embargadura di e reglamentu i asina eliminá kualke posibel mal komprendimentu.
