Ta kontribuí na modernisashon, mehorashon di higiena i halsamentu di e nivel di seguridat pa usuarionan i bishitantenan
WILLEMSTAD – Minister di Desaroyo Ekonómiko, Ruisandro Cijntje, a firma un akuerdo dia 21 di mart último ku Jemar Building & Construction Management N.V., kual ta e kontratista ku a gana e destaho públiko na
final di 2022 pa drecha e edifisio di Plasa Nobo. E akuerdo ku a wòrdu firmá resientemente, ta pa e kontratista kuminsá ku e trámitenan pa entre otro remplasá tur e pilánan na e edifisio. Esaki ta un trabou èkstra ku no a konta kuné na inisio di e proyekto di renobashon di Plasa Nobo. Mantenshon i renobashon di e plasa aki ta kontribuí na e meta di Gobièrnu pa modernisá e plasa, halsa e nivel di seguridat pa e usuarionan i bishitantenan, i mehorá e parti di higiena.
Plasa nobo tin un ròl importante den nos sentro di siudat. E ta un edifisio ku un diseño úniko, situá na un sitio sentral i aksesibel den Punda. Ademas, meskos ku tur marshe rònt mundu, nos Plasa Nobo ta un sentro di aktividat ekonómiko i un lugá di enkuentro kaminda hende por bini huntu pa sosialisá, pa kumpra produktonan i pa kome òf bebe algu.
Konstrukshon di e plasa aki a finalisá na aña 1974 i dia 3 di febrüari 1975 a habri su portanan. For di e tempu ei, nunka a hasi e mantenshon nesesario na e edifisio. Pa e motibu ei, e edifisio ta den mal estado. Banda ku e no ta atraktivo mas pa bista, e situashon ta basta alarmante. E dak tabata den mal estado, na algun sitio e betòn di e pilánan i di e plafòn a daña i a kuminsá sker i e instalashonnan di elektrisidat ta den mal estado, lokual ta nifiká ku e situashon ta basta peligroso. Tambe e sistema di riolering ta antikuá i den mal estado lokual ta trese situashonnan ku no ta higiéniko.
Despues di a hasi un destaho públiko na 2022, mesora a kuminsá drecha e dak. Sinembargo e sobrá trabounan a haña hopi retraso komo ku a konstatá ku e pilánan ku ta karga e dak ta den mas mal estado ku loke a wòrdu indiká inisialmente. Debí na esaki, a laga ekspertonan hasi algun análisis di e situashon i formulá rekomendashonnan kon pa sigui. Aktualmente ta bai kuminsá ku e trabounan nesesario pa remplasá e pilánan, drecha e betòn n’e plafòn tur kaminda ku esaki ta nesesario i saneá e situashon di elektrisidat i riolering den e plasa, ya ku esakinan ta e partinan mas urgente pa garantisá seguridat i higiena den plasa. Despues lo a sigui ku e sobrá trabounan pa drecha e edifisio i hasié atraktivo.
Segun minister Cijntje, e intenshon ta pa Plasa Nobo haña un “facelift” i un identidat nobo, ku funshonnan atraktivo banda di e funshon di marshe. Esaki lo atraé públiko durante tur parti di dia, inkluyendo den oranan di anochi, lokual lo kontribuí na stimulá mas aktividat ekonómiko i revitalisá nos sentro di siudat. Tambe ta intenshon pa hasi e dak aksesibel, komo un mirador for di kual por haña un bunita bista di nos sentro di siudat.
Den e promé fase di e trabounan, lo mester re-ubiká e komersiantenan ku aktualmente ta den plasa, temporalmente na un otro sitio, pa por garantisá nan seguridat i pa por aselerá e trabounan. Naturalmente ta importante pa e komersiantenan aki por sigui bende nan produkto i servisio nan durante e periodo aki i gana nan pan di kada dia. Pa e motibu ei Fundashon Marshe, den estrecho konsulta i kolaborashon ku e komersiantenan den plasa i ku Ministerio di Desaroyo Ekonómiko lo plania e mudansa pa e sitio temporal. Na momento ku ta konosí ki dia e mudansa lo tuma lugá i unda e sitio temporal lo ta, lo informá pueblo di Kòrsou i tambe organisashonnan enkargá ku turismo debidamente pa nan por sigui bishitá e komersiantenan di Plasa Nobo durante e periodo aki.
