Notisia

WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn a invitá na su gabinete sr. Wilfred Isabella, ku a keda asesorá pa sr. Jean Fransisca i sr. Stanley Gonet, pa skucha for di nan kiko ta e motibunan di e diferensia di opinion entre ekiponan ku ta miembro di Federashon di Futbòl Kòrsou (FFK) i direktiva di FFK.

Komo Minister enkargá ku deporte sr. S. van Heydoorn den pasado a kombersá di forma no ofisial ku dirigentenan di futbòl i un aña pasa a sinta na mesa di forma ofisial ku e presidente aktual di FFK. E problemanan den e deporte di futbòl ta sigui eskala i partidonan no ta yegando na un entendimentu i Minister lo trata pa intervení pa wak si por yega na un solushon.

A kombersá riba diferente punto manera entre otro e deskonfiansa di miembronan den e presidente aktual, kambio di statutonan, elekshon i situashon di atenshon relashoná ku reglanan di FIFA i diferente karta ku FIFA a manda pa e federashon di FFK.

Minister a gradisí e representantenan pa a honra Minister su petishon pa a reuní, pa trata na yega na un solushon. Mayan mainta Minister van Heydoorn lo reuní ku presidente di FFK pa skucha di su banda tambe. Minister van Heydoorn ta mira bèk riba un bon reunion i ta komprometé pa yuda trese un solushon den e situashon kaminda por tin pas i trankilidat bèk den e deporte di futbòl na Kòrsou.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte