Publiká riba 04 Sèptèmber 2017
En konekshon ku plantamentu den área i riba e rontonde di Plaza Hariri, for di djarason 7 di yüni próksimo tur ku ta trafiká den e área menshoná, mester tene kuenta ku eventual opstakulisashon den tráfiko. E kayanan Nijlweg, Schottegatweg West i Rooseveltweg ku ta e kayanan ku ta konektá ku e rotonde lo ta será parsialmente durante dia.
Pa finalisá e proyekto di Plasa Hariri, Kwekerij Exotische Tuinen N.V. ta bai kuminsá ku e parti di plantamentu di mata na e partinan mei mei di e kayanan kaminda no tin asfalt i tambe riba e rotonde mes. Esaki ta pa duna e toke final na e proyekto i na mes momentu pa embeyesé e área i den sierto forma sòru pa mas seguridat den tráfiko.
E trabounan tin un durashon di 3 siman i kaya lo ta parsialmente será den e orario entre 8’or di mainta pa mitar di 12 di mèrdia i di mitar di 2 di mèrdia te ku 5’or di atardi. Kayanan ta keda habri durante oranan pik esta promé ku 8’or, durante momentu di lunch i despues di 5’or di atardi. Obra Públiko ta pidi pa tur ku ta trafiká den e área pa tene kuenta ku e trabounan riba kaminda i kore ku koutela.
