Notisia

Siman di Kultura 2025, ta keda dediká na Grupo Serenada.

Willemstad – Minister di Enseñansa, Siensia, Kultura i Deporte (ESKD) sr. Sithree van Heydoorn ta anunsiá ofisialmente ku Siman di Kultura (SdK) 2025, ta keda dediká na Grupo Serenada. E aña akí, Siman di Kultura ta di e periodo di 28 di sèptèmber te ku 5 di òktober 2025 i tin komo tema: “Nos Herensia Musikal”. Ku e tema akí, Gobièrnu di Kòrsou ta pone énfasis riba e importansia di músika komo un di e pilánan prinsipal di nos identidat. Músika ta tambe un forsa ku ta uni nos i konektá nos ku otro komo siudadano di Kòrsou.

Grupo Serenada a keda lantá na aña 1975 i awe na 2025, e grupo ta selebrá 50 aña ku nan ta deleitá komunidat di Kòrsou ku nan presentashonnan. A la bes nan ta un eminensia den e mundu musikal i kultural di nos nashon. E grupo su repertorio ta konsistí di músika tradishonal di nos folklor, pero presentá den un estilo úniko i moderno. Grupo Serenada ta hasi uso di harmonia di bos i instrumentonan outéntiko manera entre otro benta, barí, tambú, chapi i hopi mas. Ku hopi pashon, nan ta dediká na re-deskubrí i konservá kansionnan na Papiamentu ku ta kore e riesgo di bai pèrdí. Di e manera akí Grupo Serenada ta kontribuí grandemente na mantené nos herensia musikal bibu.

Durante su periodo di eksistensia e grupo a lansa dies álbum, un DVD ku un rikesa di kansionnan tradishonal, klásikonan konosí i komposishonnan nobo na Papiamentu. Pa e obranan akí, nan lider musikal, Henri “Harry” Moen na aña 1993 a keda honrá ku e prestigioso Premio Cola Debrot, e rekonosimentu kultural mas haltu di Gobièrnu di Kòrsou. E eskoho pa dediká SdK 2025 na Grupo Serenada ta pa pone lus riba e ròl klave di Grupo Serenada pa salbaguardiá nos herensia musikal, nan abilidat pa konektá tradishon, inovashon i nan influensia komo embahadornan musikal di Kòrsou, tantu lokal komo internashonal. Ku “Nos Herensia Musikal” komo tema, Siman di Kultura 2025 ta un siman yená ku selebrashon, reflekshon i orguyo.

Ministerio di ESKD na nòmber di Gobièrnu di Kòrsou ta ekstendé un invitashon na komunidat kompleto, pa huntu nos ban selebrá e rikesa i nifikashon di nos músika ku ta un pilar importante di nos kultura.

Sektor di Kultura i Deporte ta spera pueblo di Kòrsou na apertura di Siman di Kultura ku ta tuma lugá dia 28 di sèptèmber próksimo for di 4or di atardi na Área di Rekreashon na Marie Pampoe . Ta bai tin animashon musikal di diferente agrupashon musikal i DJ, ku ta presentá diferente género di músika di Kòrsou manera: Grupo Serenada, Grupo Ruta, Bena Mayó, Kai òrgel, Forsa Dos, Doble R Klasiko, Dj. Krokzz ku Mc. Chris Strick, ICONS i hopi mas.

Nos herensia musikal ta nos orguyo, e ta parti di nos  Kultura i ta identifiká nos komo pueblo!

Kultura ta Nos! Ban sigui  bib’é!

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte