Willemstad – Djasabra último, SDKK huntu ku Fundashon Dam Kòrsou, a organisá e kampionato di “‘Dam rápido”, bou di guia di e lidernan lokal di FDK. E kampionato aki tabata posibel pa medio di esfuersonan inter ministerial (Ministerio di Hustisia i Ministerio di Enseñansa, Siensia, Kultura i Deporte) i sektor privá, ku a uni forsa pa mustra e vishon i mishon kompartí pa loke ta trata entre otro e desaroyo artístiko kultural i mental di e klientenan detené den SDKK. E kampionato tabata entre 11 miembro di FDK i 10 kliente di SDKK.
Na luna di mart último a inisiá, bou di guia di e dos Guiadó di Aktividatnan di SDKK, un kompetensia interno den tur e departamentonan. Tabata un invento unisèks, es desir ku klientenan maskulino i femenino a partisipá huntu. Niun hende muhé no a klasifiká pa por bai e kampionato. Despues di luna di mart último a duna e klientenan e chèns pa nan trein pa e kampionato. E meta di e kompetensia tabata pa entre otro ofresé e klientenan un aktividat edukativo den nan oranan liber, tambe pa yuda e klientenan pa kompetí ku otro na un manera sano, tambe pa motivá e klientenan pa pensa mas leu i kalkulá e konsekuensianan di kada moveshon di nan dam, tambe pa nan komportá nan mes na un forma spòrtif na momentu ku nan no gana, tambe pa nan siña dil ku ganamentu i pèrdida. I finalmente pa demostrá nan talentonan riba e tereno di dam.
E kampionato a kana den un bon esfera i e klientenan di SDKK a komportá nan mes hopi bon. E klientenan a duna di konosé ku lo ta bon pa mantené e kompetensia di dam aki tambe komo algu struktural. E klientenan tabata hopi habrí pa siña e diferente aspekto spesial ku mester tene kuenta ku ne den e deporte di dam.
Diferente di e partisipantenan di parti di FDK a ekspresá ku nan a keda sorpresá pa e manera trankil i respetuoso ku e klientenan a aserká nan i tambe kon nan tabata komportá durante di e weganan. Tin di e partisipantenan ku ta pa promé biaha nan a bishita SDKK i tabatin basta prehuisio pa ku e komportashon di e klientenan. E klientenan a apresiá e echo ku FDK a bini te den SDKK pa hunga kontra di nan. Tabata tin un hopi bon ‘teamwork’ pa por a organisá e kampionato i esaki a logra.
SDKK por bisa ku orguyo ku tres kliente a sobresalí den e kampionato aki. Un di e klientenan ta kasi un genio den e wega di dam. Ku esaki nos kier men: tur su weganan e a sali gana i e tabata hiba e weganan di mas fuerte. Den un otro kategoria nos tabatin un kliente ku a sobresalí den weganan di mas bunita hungá. I e último kategoria tabata un kliente ku tur wega e a sòru pa empatá nan. E tres klientenan aki a sali komo kampionnan indiskutibel riba e diferente terenonan spesífiko ya menshoná.
Tur hende ku partisipá i asta e personal ku tabata enkargá ku e evento aki djasabra último a kalifiká esaki atrobe komo un éksito rotundo. E tipo di proyektonan aki ta forma parti di nos proseso di resosialisashon. SDKK ta krea oportunidatnan kaminda e kliente por kombibí i komuniká riba un nivel sano i deportivo ku otro. HUNTU nos por logra tur éksito ku nos ke, hasiendo kosnan positivo.
SDKK ta sigui ku tur esfuersonan pa eduká i formá esnan ku ta detené i ku den futuro tin ku forma parti bèk di nos komunidat.
