Kòrsou, 14 di mei 2025 – Bou di e bandera di Actiecentrum Ondermijning Curacao (ACOC), Kuerpo Polisial Kòrsou (KPC) i diferente instansia, a realisá algun kontrolnan multidisiplinario na diferente garashi na Kòrsou.
Vários instansia tabata presente na e inspekshonnan akí, entre otro Kuerpo Polisial Kòrsou, Inspectie der Belastingen Curaçao, GMN (Toezicht en Handhaving), Aqualectra, Inspekshon di MEO, ROP (Toezicht en Handhaving) i PATH Curaçao.
Durante e inspekshonnan a tuma nota di vários violashon di lei serka e establesimentunan, entre otro; no ta registrá na Kámara di Komersio, no tin un ‘vestigingsvergunning’, debenan atrasá na Aqualectra, i garashinan ku no ta den poseshon di un Hindervergunning. Un negoshi mester a sera su portanan. A la bes Aqualectra a konstatá hòrtamentu di koriente serka un otro garashi. Esaki a risibí un but di 15.000 florin. Tambe tabatin vários garashi kaminda tabata stashoná vehíkulonan kantu di via públiko. E garashinan aki a haña òrdu pa kita e vehíkulonan.
Path Curaçao tambe a forma parti di e tim multidisiplinario i a papia ku e personanan indokumentá pa wak si tin señalnan di eksplotashon (laboral).
E resultadonan akí ta enfatisá e nesesidat di kontrol kontinuo i koperashon entre diferente instansianan. ACOC i Kuerpo Polisia Kòrsou ta pone énfasis riba e importansia di e kontrolnan integral aki i lo sigui realisá esakinan den futuro.
ACOC ta un organisashon ku ta kai bou di Ministerio di Hustisia i ta komprometé su mes na un aserkamentu integral i atministrativo pa kombati krímen ku ta debilitá nos komunidat, den kua koperashon entre partnernan paden i pafó di gobièrnu ta sentral.
