Publiká riba 26 Yanüari 2018
Willemstad – Dianan 31 di yanüari, 1 i 2 di febrüari próksimo, e departamentu di PEL (Personnel Licensing) ku ta pertenesé na Outoridat di Aviashon Sivil (CCAA) na Mahuma, pa motibunan atministrativo ta será pa públiko. CCAA ta pidi tur hende ku tin ku pasa nan eksamen i òf tin ku atende kualke asuntu di lisensia di piloto, kontròl aéro i òf mekániko di avion, pa tene kuenta ku den e siman benidero riba djaluna 29 i djamars 30 di yanüari ainda por hasi esei.
E sekshon di PEL (Personnel Licensing) ta responsabel pa entrega i atministrashon di lisensia na esnan ku mester haña lisensia pa sierto responsabilidatnan spesífiko manera piloto, kontròl aéreo i mekániko. Alabes e sekshon di PEL ta outorisá i ekipá pa duna eksamen di piloto, kontròl aéro i tambe mekániko di avion.
Outoridat di Aviashon Sivil ta diskulpá su mes pa eventual inkombeniensha ku esaki por trese i ta rekordá ku djaluna dia 5 di febrüari su ofisina di PEL ta habri normalmente bèk. Su orarionan ta di djaluna pa djabièrnè di 8or di mainta pa 12or di mèrdia i di 13:30 te ku 4:30 di atardi na Kaya Afido z/n, Mahuma. Pa kualke informashon adishonal semper por tuma kontakto via +599(9) 839 3319 òf civilair@gobiernu.cw
