Publiká riba 21 Mei 2024
Willemstad- E sektor turístiko ta sigui mustra sifranan hopi positivo; kontribuyendo na kuponan di trabou, reserva di divisa i tambe na nos Produkto Bruto Interno (GDP). Esaki, tabata e mensahe sentral durante e promé konferensha di prensa di partnernan turístiko na Kòrsou pa aña 2024. Minister di Desaroyo Ekonómiko, sr. Ruisandro Cijntje, huntu ku su ministerio, Curaçao Tourist Board (CTB), Curaçao Hospitality & Tourism Association (CHATA) i Curaçao Ports Authority (CPA) a bini huntu pa duna un bista di e desaroyonan turístiko di aña 2023 i pa e promé 4 lunanan di 2024.
Durante di e konferensha di prensa akí, CTB a informá ku den e promé 4 lunanan di 2024, Kòrsou a risibí un total di 242.680 mil turista di estadia kual ta un kresementu di 31% kompará ku e mesun periodo na 2023. Durante e periodo akí, turistanan a keda un total di 2.1. mion anochi riba nos isla. Pa e aña akí, Kòrsou lo konosé un kantidat adishonal di 232 mil stul aéreo for di diferente merkado, kual lo suma un total di 1.2. mion stul. Den e periodo tras di lomba, CTB a partisipá na diferente feria turístiko den nos merkadonan di enfoke i a kordiná pa diferente programa di televishon internashonal bin hasi grabashon na Kòrsou. Por pensa aki riba entre otro GLOBO TV di Brazil i Goede Tijden, Slechte Tijden di Hulanda. Tambe CTB a sòru pa propagandanan di Kòrsou na diferente área públiko den eksterior manera stashon di trein na New York i a prolongá e akuerdo di promoshon ku entre otro Atlanta Braves i Miami Marlins.
E programa di treinen ‘Her & Bijscholing’ tambe ta kontinuá eksitosamente. Un kantidat di 500 persona a terminá e kursonan akí mientras 300 trahadó den e industria turístiko a sigui tambe e seminario di Ekselensia den Servisio di e institushon di treinen di Disney World.
Pa loke ta trata nos sektor hotelero, CHATA ta informá ku den e promé lunanan di aña 2024, hotèlnan na Kòrsou a logra un okupashon di 72.8% lokual ta levemente mas haltu ku e72.7% den e mesun periodo akí na 2023. Apesar ku esaki ta un oumento modesto, e sifranan akí ta mustra un stabilidat den nos kantidat di bishitantenan i sifranan di estadia. E Entradanan pa Kamber Disponibel (RevPAR) a oumentá ku un total di 7.9%, for di $163.47 na aprel 2023 pa $ 176.43 na aprel 2024. Pa loke ta trata nos Tarifa Promedio Diario (ADR), tambe Kòrsou a mira un oumento saludabel di no ménos ku 7.8% lokual ta nifiká un total di $242.42 na aprel 2024 kompará ku $224.85 den e aña anterior. E sifranan akí ta suprayá nos abilidat pa mehorá balor i mantené preisnan kompetitivo na mes momentu. Prestashon hotelero te ku luna di aprel 2024 ta mustra un oumento satisfaktorio den un oumento akumulativo di nos Entradanan pa Kamber Disponibel (RevPAR) di $174.09 den 2023 pa $ 205.55 den e mesun periodo akí na 2024.
CPA a anunsiá ku Kòrsou a yama bonbiní na un total di 286 barku krusero na aña 2023, lokual ta marka un oumento di 2% si nos kompará esaki ku sifranan di 2022. Ta notabel ku nos a risibí un kantidat di 710,623 turista krusero na Kòrsou den e periodo akí, un oumento supstansial di 33% kompará ku e aña anterior. E desaroyonan akí por keda atribuí na entre otro un konsistensia den nos tarifanan di okupashon i un oumento den e kantidat di bishitanan dor di barkunan grandi.
Si nos mester wak e promé 4 lunanan di 2024, e desaroyonan positivo ta kontinuá ku un total di 429,744 turista krusero ku a bishitá nos isla kaba pa medio di 163 barku krusero lokual ta nifiká un oumento di 16% turistanan krusero i 11% di barkunan krusero kompará ku e promé 4 lunanan di 2023. Adishonalmente, e averahe di okupashon durante e periodo akí di 2024 a alkansá 92%.
Royal Caribbean, Carnival Cruises i Celebrity Cruises tabata e liñanan krusero ku mas a bishitá nos isla. Konsiderando e diferente sup-barkunan, Royal Caribbean Group i Carnival Corporation ta esnan mihó representá ku respektivamente 46% i 36% di nos merkado miéntras ku Norwegian Cruise Line ta okupá 10% di e kantidat total di pasaheronan krusero. CPA ta premirá ku e trayektoria positivo akí lo kontinuá, ku un proyekshon di 800.000 pasahero krusero ku posiblemente lo bishitá nos isla pa fin di 2024.
Pa loke ta trata e impakto ekonómiko di turismo MEO ta konkluí ku 2023 tambe tabata atrobe un aña hopi
eksitoso. Esaki debí na e kresementu di tantu turismo di estadia surpasando e rèkòrt di 500.000 turista komo turismo krusero den aña 2023. Den aña 2023 e sektor di turismo a generá un total di 4.089 mion florin pa nos ekonomia kompará ku 3.344 mion florin den 2022 despues di un rekalkulashon den e modelo di Turistika ku e aña aki a wòrdu di “update”. Esaki ta representá un porsentahe di kresementu di 22%. Pa prome kuartal di 2024 MEO ta kalkulá ku e sektor di turismo a generá un total di 1.752 mion florin. Esaki ta basá riba kantidat rèkòrt di turistanan ku a bini surpasando mas ku 20% di kresementu kada luna si kompará ku mesun lunanan den aña 2023. Pa sobrá di 2024 MEO ta proyektá ku turismo lo tin un kontribushon hopi positivo riba Kòrsou su Produkto Interno Bruto. MEO huntu ku CTB ta enfoká pa ehekutá riba termino korto un estudio di “carrying capacity” di turismo ku mira pa kontinua ku un desaroyo i kresementu di turismo di un forma duradero i responsabel i tambe kuminsá hasi un investigashon pa por realisá un Tourism Satellite Account (TSA) pa Kòrsou ku datonan mas amplio i direkto pa ku e impakto di turismo a base di mas indikadónan ku solamente e kantidat di turistanan ku a bini di bishita.
Bo por klek aki pa download e presentashon kompletu ku a keda kompartí durante e promé konferensha di prensa di turismo pa 2024.
