Publiká riba 19 Mei 2024
E proyekto ta enfoká prinsipalmente riba 5 punto krusial. E puntonan ta: alumno, dosente, mayornan, material i maneho den enseñansa relashoná ku digitalisashon. Dor di traha riba e puntonan di forma integral, ta enfoká pa duna atenshon personal i impaktá bida di kada alumno mas profundo i asina redusí falta di atenshon na alumnonan den enseñansa. E aparatonan no ta representá solamente teknologia, pero nan ta krea speransa i oportunidat pa alumnonan ku tin difikultat visual. E obhetivo ta pa ekipá e alumno ku hèrmènt pa mehorá e eksperensia i stimulá inklushon den nos sistema di edukashon.
Kada aparato ta keda programá ku aplikashon i diseñá di forma personalisá, pa asina garantisá ku e studiante por usa esaki di forma optimal. E proyekto ta bai keda lansá den luna di sèptèmber awor kaminda ta invitá tur partner ku ta interesá den e trayekto aki. Un trainer sertifiká di e kompania Apple ta bai duna tur informashon, guia i kapasitashon básiko pa e ehekushon i implementashon relashoná ku, digitalisashon den enseñansa pa alumno ku difikultat visual, den e próksimo aña eskolar.
Ministerio di ESKD ta mantené su mes na e kompromiso pa apoyá: maestro, alumno i mayor den e área di enseñansa. E ophetivo ta pa krea oportunidat, inová, krea un ambiente edukativo positivo i moderno, i adaptá e maneho segun e nesesidat di e alumno pa e por haña un eksperensia mas amplio posibel den enseñansa. Esaki ta e intenshon pa tur alumno. P’esei e logro aki ta di selebrá pasobra nos alumnonan ku difikultat visual tambe ta keda inkluí.
Minister di ESKD sr. Sithree van Heydoorn ta sumamente kontentu ku e logro aki. Danki na e esfuerso di e tim di digitalisashon i ‘partners’ manera e kompania EXNESS ku huntu ta traha den harmonia pa inklushon den enseñansa di forma moderno.
—
KOMUNIKASHON
*Riba e potrèt athunto por tuma nota di e momentu ku representantenan di e kompania EXNESS señores Jacob Wissum i Rubel Quamruzzaman a hasi e entrega na Minister di ESKD sr. Sithree van Heydoorn i Presidente di e komishon di digitalisashon sra. Samira Saab. Pa mas potrèt por bishitá: Device pa alumno ku difikultat visual