Publiká riba 25 Mart 2026
WILLEMSTAD – Servisio Meteorológiko di Kòrsou a selebrá World Meteorological Day ku un evento eksitoso i inspirativó, kaminda a para ketu na tantu pasado komo futuro di meteorologia tabata sentral.
Direktor di Meteo, Sr. Martis a elaborá tokante e historia riku di meteorologia, for di fundashon di World Meteorological Organization te ku desaroyonan di awe. Den su diskurso, el a pone enfasis riba e importansia kresiente di teknologia inovativo, inkluyendo inteligensia artifisial (AI), pa futuro di pronóstiko di tempu i servisio.
Minister Charles Cooper a mustra su apresio pa empleadonan di Servisio Meteorológiko. El a felisitá nan pa nan esfuerso i a gradisí nan pa nan kontribushon importante na komunidat di Kòrsou.
Un momentu spesial durante e evento tabata e kontribushon di Sra. Maria Liberia-Peters, den su ròl komo presidente di Fundashon Estatua mr. dr. Moises Frumencio da Costa Gomez. Na nòmber di e fundashon, el a pone un teleskop ku tabata di Dr. Da Costa Gomez disponibel na Servisio Meteorológiko den forma di bruikleen, pa honra i preservá su legado.
Tambe sektor di aviashon tabata representá. Un representante di Aero Club a ekspresá su gradisimentu na Servisio Meteorológiko pa nan informashon diario i konfiabel, ku ta di gran importansia pa siguridat di pilotonan na Kòrsou.
Ademas, Servisio Meteorológiko a probechá e okashon pa lansá dos video nobo di konsientisashon. E video nan ta enfoká riba duna mas konosementu tokante servisionan pa sektor di aviashon i maritimo, ku atenshon speshal tambe pa piskadó lokal.
E evento a transkurí den un ambiente kaluroso i agradabel, i a mustra klaramente e balor grandi di servisio meteorológiko pa diferente sektornan den komunidat di Kòrsou.
