Notisia

WIllemstad : Analises nobo di datonan di Senso 2023 ta duna un bista kla riba e desaroyo entre e grupo di migrantenan na Kòrsou. Migrantenan ta un parti importante di e poblashon i ta mustra diferensia notabel den komposishon demográfiko, partisipashon den edukashon, posishon den merkado laboral i salú.

Aki ta sigui algún resultado:

Migrantenan ta forma 24,6% di e poblashon
Kòrsou a konta 155.826 habitante den 2023, di kua 24,6% ta migrantenan di promé generashon. Esaki ta un kresementu kompará ku 2011. E grupo mas grandi ta bini di Hulanda, Colombia i Repúblikana Dominikano. E kantidat di Kolombiano i Venezolano a krese hopi, mientras ku migrantenan di Sürnam, Aruba, islanan BES i Portugal a baha.

Demografía: mas hende muhé i un populashon ku ta bira mas bieu
Hopi grupo di migrante ta konsistí pa un mayoria di hende muhé, partikularmente esnan di Colombia, Repúblika Dominikano, Jamaica i Aruba.
Mayoria di migrantenan – meskos ku na Kὸrsou – ta den edat di 45–64 aña.
personanan nace na Venezuela ta forma un grupo relativamente hóben, mientras ku migrantenan di Portugal i Aruba tin un edat mas haltu. Den tur grupo, por mira ku e porsentahe di 65+ a subi kompará ku aña 2011, loke ta indiká embehesementu.

Nivel di enseñansa
Partisipashon na skol ta varia fuerte entre diferente grupo di migrantenan.

• Den edat di 6–15 aña, desendientenan di Aruba i Repúblika Dominikano ta skor mas haltu; mientras ku esnan di Jamaica mas abou.
• Den edat di 16–24 aña, personanan di Sürnam i Hulanda ta skor haltu, mientras ku esnan di Colombia i Haïti ta keda atras.

Na tur kategoría di edat, partisipashon eskolar ta mas abou ku na 2011.

Merkado laboral i entrada

Migrantenan di islanan BES, Aruba i Portugal ta partisipá mas den e merkado laboral. Desempleo ta mas haltu bou di e grupo Dominikano, Venezolano i Haitiano. E patronchinan ta similar ku Senso 2011.
Kompará ku 2011, mas hende (tantu lokal komo migrante) a move pa un kategoria di entrada mas haltu.

Pero no tur grupo ta risibí kompensashon igual segun nan nivel di estudio.
Migrantenan hulandes ta risibí e mihό rekonosemento segun nan diploma, mientras ku migrantenan hόben di Venezuela i Repúblika Dominikano ta kai regularmente den kategoria di entrada mas abou. Esaki ta indiká falta di rekonosementu pa diploma estranhero.

Idiomanan di kas
Papiamentu ta keda e idioma di kas mas papiá riba nos isla, siguí pa Spañó i Hulandes.
E grupo Kolombiano i Venezolano ta papia prinsipalmente Spañό.
Hopi Dominikano i Haitiano ta papia Papiamentu na kas.
For di 2011, uso di Spañó i Inglés a krese.

Salú
Mayoria di habitante ta evaluá nan salú komo bon te hopi bon.
Enfermedatnan komun bou di e grupo migrante ta inkluí:

• Preshon haltu i diabet: prinsipalmente entre e grupo Dominikano i Kolombiano
• Glaucoma: mas frekuente entre e grupo Dominikano i migrantenan di BES
• Obesidat: relativamente haltu entre e grupo Dominikano, Hulandes i Venezolano

E publikashon ‘Migranten in Curaçao’ ta disponibel via e website ofisiál di CBS: www.cbs.cw i via e website di Senso 2023 https://senso.cbs.cw

MAS NOTISIA

Ministerio konserní: Maneho di Gobernashon, Planifikashon i Servisio Públiko