Notisia

Willemstad- dos siman pasá Minister di Enseñansa, Siensia, Kultura i Deporte, sra. Marilyn Alcalá-Wallé, despues di otro reunion ekstenso ku habitante- i organisashonnan di bario di Seru Grandi/Fuik i bisendario, a duna lus bèrde pa hasi e trámitenan pa kuminsá prepará e rekonstrukshon di skol Mgr. Julio Henriquez den un sentro multifunshonal pa sirbi habitantenan grandi i chikitu den e bario.

Aktualmente e sentro ta operashonal ku diferente aktividat pa bario. Por ehèmpel Fundashon Amigonan di Cristu, ku ta duna rekreashon despues di ora di skol ta hasiendo trabou ku hobennan den e sentro. Un grupo di hoben ku no ta bai skol regular mas tambe ta hasi uso di espasio na e sentro pa siña un fishi. Diferente aktividat rekreativo ta tuma lugá na e sentro. Krus Kòrá ku no tin un sede na Bandariba tambe a ofresé e bario pa traha un shèlter ku por fungi komo ouksilio na momento di un kalamidat.

Mirando ku e desaroyo aki ta tresiendo inkietut bou di un kantidat di habitante, e esfuersonan grandi di parti gobièrnu pa kumpli ku Banda’riba i tumando nota di e publisidatnan negativo pa ku tur e esfuersonan pa e desaroyo aki pa Banda’riba i e echo ku habitantenan a aserká Parlamentarionan pa miedu di e desaroyo aki, Minister Alcalá-Wallé a tuma e desishon pa para e plannan pa ku desaroyo di e sentro aki di inmediato.

**********************************************************************************

MAS NOTISIA

Ministerio konserní: Enseñansa, Siensia, Kultura & Deporte