WILLEMSTAD, 8 di februari 2017- E portal online di Servisio di Impuesto resientemente tambe ta aksesibel den Ingles. Banda di esaki e portal online tin tambe funshonalidat nobo ku ta hasié mas fásil pa terser deklará impuesto na nòmber di un persona òf negoshi. Den kaso ku un empresa ta hasi deklarashon di belasting pa un òf mas kliente, esaki por tuma lugá for di awe pa medio di un kuenta (account). Tene kuenta ku desde 2017 mester deklará impuesto online pa lei.
Desde awor tur pagadó di belasting por trahá un kuenta sea den Ingles òf Ulandes. Tur paso den e proseso pa deklará belasting i komunikashon den e portal ta tuma lugá den e idioma ku bo a skohe. Dentro di poko lo ta posibel ku por skohe Papiamentu komo e idioma di preferensia.
E portal tin tambe un funshonalidat nobo ku ta fasilitá deklarashon dor di terser pa e pagadó di belasting. Den kaso ku un empresa ta hasi deklarashon pa un òf mas pagadó di belasting, e lo por hasi esaki usando un solo kuenta. E no ta nesesario mas pa trahá i usa un nòmber i kódigo di entrada apart pa kada pagadó di belasting. E funshonalidat nobo ta hasi tur kos mas fásil i ta hasié posibel pa empoderá un terser pa registrá i hasi deklarashon online pa e pagadó di belasting.
For di komienso di e aña aki mester hasi deklarashon online pa lei. Deklará impuesto online tin hopi benefisio. Asina ta posibel pa na kada momentu di dia, unda ku bo ta, deklará impuesto online, sea bo ta na kantor i hasta riba kaminda. Dor di deklará impuesto online bo no tin nodi di para mas den rei na Servisio di Belasting. Banda di esaki atendementu di asuntunan di belasting online ta kontribuí na konservashon di nos medio ambiente debí ku bo no ta hasi deklarashon riba papel mas. Deklarashon online ta pòrnada i por hasié 24 ora pa dia i e ta disponibel 7 dia pa siman.
Modernisashon di Servisio di impuesto ta dal pasonan firme pa dilanti. Diariamente tin un tim dediká na hasi deklarashon di belasting mas fásil, rápido i sigur pa tantu empresanan komo partikular. Pa fasilitá e pagado di belasting aun mas tin un Helpdesk Online Aangifte. E Helpdesk su tarea prinsipal ta pa informá i sostené e pagadó di belasting den trahá su kuenta (account) pa hasi su deklarashon online riba e portal i reglá tur su asuntunan di impuesto na Kòrsou online. E Helpdesk ta alkansabel via telefòn na 734-2570 di djaluna pa djabièrnè entre 08.30 pa 11.30 i 13.00 pa 17.00 òf via di e-mail helpdeskbelastingdienst@minfin.cw
