Willemstad – For di djadumingu 12 te djabièrnè 16 di mei 2025, Ministerio di Desaroyo Ekonómiko (MEO) ta organisá e di 9 edishon di Siman di Eksportashon di Kòrsou, bou di e tema aktual i relevante: “Eksportá den Tempu di Kambio.”
Den un mundu kaminda komèrsio internashonal ta enfrentando preshon pa motibu di kambio geopolítiko, digitalisashon i responsabilidat klimátiko, e siman di eksportashon aki ta sirbi komo plataforma pa funshonarionan ku ta krea maneho, empresarionan i ekspertonan internashonal diseñá strategia i identifiká oportunidatnan pa kresementu den eksportashon.
E apertura ofisial lo tuma lugá djaluna 12 di mei na Renaissance Wind Creek Curaçao Resort, ku introdukshon na enkargo di señora Vanessa Toré, Direktor di Kolaborashon Ekónomiko Internashonal, siguí pa e apertura formal dor di Minister Charles Cooper di Desaroyo Ekonómiko.
Durante e siman lo tin varios seshon interaktivo riba tópikonan manera, Turismo médiko i wellness, Ekonomia Blou i bio-industria, Komèrsio digital, Industria kreativo i un Hackathon spesial di eksportashon, kaminda ta desaroyá solushonnan pa desafionan di eksportashon di MKB’s.
Un elemento importante nobo di e edishon aki ta e lansamentu di e seri “Doing Business in”, ku ta enfoká riba paisnan di CARICOM komo merkado potensial pa empresarionan di Kòrsou. E seri lo kuminsá ku dos seshon spesial: Doing Business in Barbados i Doing Business in Trinidad & Tobago. E seshonnan aki lo duna informashon práktiko, sifranan di merkado i chèns pa empresarionan netwerk i ekspandé den region.
Entre e partnernan internashonal ku lo partisipá tin ExporTT, RVO Hulanda, International Trade Centre (ITC), University of the West Indies (UWI), huntu ku representantenan di Banko Sentral di Kòrsou i Sint Maarten (CBCS), Universidat di Kòrsou (UoC) i ADECK, CIFC, CMA, VBC i Digital Hub Americas. A reservá un papel importante pa e delegashon di Caribbean Export Development Agency, ku lo bishitá Kòrsou spesialmente pa partisipá den e siman. Nan lo kompartí konosementu riba desaroyo eksportashon den region i bai den dialógo ku empresarionan i organisashonnan lokal riba kolaborashon, sosten i akeso na merkadonan nobo den Karibe.
“Siman di Eksportashon di Kòrsou ta mas ku un tradishon, e ta nos momentu anual pa determiná rumbo i traha huntu riba un ekonomia basá riba eksportashon,” segun señora Vanessa Toré. “Ku kolaborashon internashonal, aktualisashon di maneho i sosten dirigí, nos ta traha pa hasi Kòrsou mas fuerte i orientá riba futuro.”
“Nos a demostrá ku Kòrsou no tin miedu di desafionan. Apesar di krísis finansiero, seramentu di frontera i pandemia, nos a sigui traha riba diversifikashon i turismo. Awor ta e momentu pa mira mas leu, tantu na nivel regional komo internashonal i fortifiká nos kapasidat pa eksportá,” segun Minister Charles Cooper.
Siman di Eksportashon ta un parti esensial di e Strategia Nashonal di Eksportashon (NES) i ta wòrdu kordiná pa Sektor di Kolaborashon Ekónomiko Internashonal (Buitenlandse Economische Samenwerking: BES), ku ta enkargá ku maneho di komèrsio, promoshon di eksportashon, fasilitashon di invershon, kolaborashon internashonal i desaroyo sostenibel.
Por registrá pa e diferente seshonnan ku lo tuma lugá durante e siman via curacaoexport.org. Pa mas detaye i aktualisashon por sigui e website menshoná i e páginanan sosial di Curaçao Export Week.
