WILLEMSTAD – E aña akí nos ta sigui usa e logo ku nos a introdusí na 2024 kreá pa di e studio kreativo Bagi Creative Studio. E logo ta enfatisá ku e kultura di Kòrsou ta un union di naturalesa, historia, músika, herensia i e sentido di komunidat. Kada elemento ta karga su propio balor, i huntu nan ta konta e historia di un isla diversifiká ku ta orguyoso di su kultura.
E edishon di e aña akí ta dediká totalmente na músika i ekspreshon musikal di Kòrsou. Ku e tema ‘Nos Herensia Musikal’, nos ke pone énfasis riba e poder di músika komo ekspreshon di kultura, union sosial, kreatividat i identidat. Músika ta un parti esensial di nos kultura. Músika ta uni hende, duna inspirashon, i yuda krea un komunidat mas fuerte. Durante di e siman nos ke trese dilanti nos músikonan lokal ku ya bai laga nos i na mes momento nos ke para ketu tambe na tur nos artistanan lokal, kompositornan, kantantenan i tur ku ta toka un ke otro instrumènt musikal i tambe nos bailenan.
A la bes ta pone atenshon riba tur tipo di músika ku tin rais lokal. Ta enfoká riba músika tradishonal di Kòrsou manera tambú, seú, muzik di zumbi i ka’i òrgel, tumba te na género moderno manera músika urbano i tambe nos artistanan lokal ku ta tene nos músika di Kòrsou bibu. E meta ta pa selebrá diversidat musikal riku di nos isla i uní e diversidat di generashonnan ku ta biba akí na Kòrsou.
Durante di Siman di Kultura nos ta konta ku partisipashon di henter komunidat i bishitantenan: ‘ta un siman kultural pa tur hende’. Nos ta invitá organisashonnan kultural, skolnan, empresanan, skolnan di musikal privá, skolnan di baile, sentronan di bario, barionan, hotèlnan i institutonan intra mural pa tuma parti na e siman akí.
For di Wèspùnt te Ostpùnt, di mucha chikí te hende grandi, pa huntu nos selebrá kultura durante di e siman kultural. Apertura ta tuma lugá dia 28 di sèptèmber 2025, pronto ta komuniká mas tokante di e diferente aktividatnan.
Banda di e aktividatnan ku Sektor di Kultura i Deporte ta koordiná nos kier enkurashá pueblo di Kòrsou, esta skolnan, organisashonnan i empresanan pa organisá aktividatnan rondó di e tema. Di 28 di sèptèmber te ku 5 di òktober: Kòrsou ta selebrá músika. Partisipá, baila, kanta, toka, disfrutá i honra nos mes hendenan.
Si bo tin pregunta tokante siman di kultura 2025 òf bo kier kompartí ku nos aktividat ku bo ta organisá, bo por manda nos un mensahe di WhatsApp na +5999 5166973 òf manda un mail na: aisha.leer@owcs.gov.cw.
—
KOMUNIKASHON
organisá, bo por manda nos un mensahe di WhatsApp na +5999 5166973 òf manda nos un mail na: aisha.leer@owcs.gov.cw.
—
KOMUNIKASHON
