Publiká riba 04 Sèptèmber 2025
Willemstad – Gobièrnu di Kòrsou ta kontinuá ku preparashon pa tur tipo di krísis i desaster. Un aksidente aéreo tambe ta un di e menasanan identifiká den nos perfil di riesgo. Apesar ku e chèns pa un aksidente aéreo ta hopi chikí, tòg ta importante pa ta prepará pa esaki.
Konforme lei di krísis i kalamidat, pero tambe pa kumpli ku reglanan internashonal di aviashon, Curaçao Airport Partners (CAP) ta organisá djasabra, 6 di sèptèmber 2025, un simulashon di un aksidente ku avion. E treinen aki lo ta den koopershon i koordinashon ku tim di krísis di Kòrsou: Crisisbeheersing & Rampenbestrijdingsorganisatie (CRBo). Esaki mirando ku den kaso di un insidente di tal índole, e probabilidat ta grandi ku lo aktivá e tim aki pa yuda ku koordinashon i pa tene nos pais ‘safe’.
Pa por praktiká mas realístiko posibel, a opta pa hasi e entrenamentu den forma di un simulashon. Mirando e importansia di operashon di nos aeropuerto i pa minimalisá konsekuensianan pa ku operashon diario na Hato, a kuminsá basta luna pasá ku e preparashonnan pa e simulashon aki.
Tim di krísis a tuma nota di un video ku ta bai rònt via di medionan sosial ku ta alegá ku e simulashon ariba menshoná ta den kuadro di tenshonnan di último tempu den nos region. Apesar ku e informashon den e video no ta kuadra i tampoko no por konfirmá e outentisidat di orígen di e video aki, Sr. Lesley Fer komo koordinador di krísis di Kòrsou i tambe e outoridat responsabel pa e tim di krísis, ke pidi pueblo pa keda trankil i sigui kanalnan ofisial di Gobièrnu. Tambe sr. Fer ta hasi un apelashon pa no “share” informashonnan ku no sali di fuentenan ofisial. Informashonnan eróneo ta krea mas pániko innesesario i no ta kontribuí na nada sano pa nos pais.
E simulashon na aeropuerto di djasabra awor ta unu pa kumpli ku leinan lokal i tratadonan internashonal den aviashon. Esaki no ta kita si for di e importansia pa kada siudadano ta bon informá i tambe prepará pa tur situashon di krísis òf desaster ku por presentá.
Tim di krisis di Kòrsou CRBo ta sigui praktiká den afan pa protehá nos komunidat. Alabes kier rekordá komunidat ku ainda nos ta den temporada di orkan te ku 30 di novèmber. Algun tep balioso ta pa sòru pa bo tin bo pakete di emergensia (awa, remedi, sèn kèsh, kuminda na bleki, papel higiéniko, radio transistor ku bateria, flèshlait, èts), praktiká un plan di emergensia ku famia i yuda otro kaminda por.
Laga nos tur ta mihó prepará.
