Publiká riba 16 Ougùstùs 2024
Willemstad – Ministerio di Salú, Medio Ambiente i Naturalesa a tuma nota di e situashon aktual tokante Mpox, anteriormente yamá Monkeypox.
Situashon mundial
Dia 14 di ougùstùs 2024, Organisashon Mundial di Salú (World Health Organization, WHO) pa di dos biaha, den un lapso di tres aña (promé biaha na 2022), a kategorisá Mpox komo un malesa di interes internashonal (Public Health Emergency of International Concern, PHEIC). Esaki ta e nivel di alerta mas haltu ku WHO por deklará. Ku e klasifikashon di Mpox komo un malesa di interes internashonal, WHO ta pidi tur pais pa ta prepará pa identifiká posibel kasonan di Mpox i pa tuma e medidanan nesesario pa evitá transmishon lokal. Aktualmente Mpox ta konsentrá na Afrika Sentral, na e paisnan Repúblika Demokrátiko di Congo, Burundi, Ruanda, Uganda i Kenia. E último kuater paisnan menshoná no a yega di mira kaso di Mpox anteriormente. E malesa Mpox por resultá fatal i na e momentunan aki e kantidat di kasonan mortal a surpasá e kantidat di e aña anterior.
Ministerio di Salú, Medio Ambiente i Naturalesa ta informá ku Servisio di Salú Públiko di Kòrsou ta den preparashon pa kumplí ku e tareanan di monitoreo i kòntròl. Manera den kaso di otro malesanan infeksioso un kolaborashon entre tur e partnernan, e.o. dòkternan di kas, spesialistanan i laboratorionan, ta esensial pa prevení i kontené e malesa den nos komunidat. Ministerio di Salú, Medio Ambiente i Naturalesa a korto plaso lo sigui informá komunidat di Kòrsou tokante di Mpox.
Pa informashon adishonal por tuma kontakto ku Irálice Jansen, hefe di departamentu Infectieziektebestrijding (IZB) riba number di telefòn: 523 1530.
