Notisia

EMMY BERTHOLDSCHOOL A LANSA SU BUKI “EMMY BERTHOLDSCHOOL FO SCHRIJFT” DEN PRESENSIA DI MINISTER VAN HEYDOORN

WILLEMSTAD –  Skol di fundeshi Emmy Bertholdschool, ku ta un skol di UNESCO a lansa publikashon di nan buki na hulandes “Emmy Bertholdschool FO schrijft.” E lansamentu a tuma lugá durante un mainta hopi ameno, den presensia di Minister di Enseñansa, Siensia, Kultura i Deporte (ESKD) sr. Sithree van Heydoorn i Sekretario General di UNESCO pa Kòrsou sra. Marva Browne i mas invitadonan.

Tabata un momentu hopi speshal  pa motibu ku Minister di ESKD sr. Sithree van Heydoorn a haña e honor pa ta Padrino di e buki i sra. Browne Madrina.  Na mes momentu minister sr. Sithree van Heydoorn a indiká di ta sumamente honrá ku e título di ta Padrino i a splika ku e tin e skol na kurason. Pa aña 2025 ya ta di 3 biaha ku el a bishitá  e skol di fundeshi Emmy Berthold. E mandatario a suprayá di kumpli ku su responsabilidat  komo Padrino meskos ku sra. Browne tambe a primintí.

E proyekto aki su meta ta pa stimulá alumnonan pa skibi i ta liber pa ekspresá nan sentimentunan pa medio di haiku, kuenta i poesia. Skibimentu di e buki aki ta parti di e proyekto kaminda e kuater skolnan di UNESCO a partisipá i ta partisipando na dje. E promé skol ku su alumnonan mes a skibi i hasi e ilustrashonnan ta skol di fundeshi kolegio Don Sarto na aña 2019, sigui pa skol di fundeshi Kolegio San Dominico na 2024.  E aña aki 2025 a toka turno na skol di fundeshi Emmy Berthold pa lansa nan buki. E siguiente Skol di UNESCO ku ta partisipando den e proyekto aki pa lansa na buki na 2026, riba Dia Mundial di Buki i Derecho di Outor, ta skol di fundeshi J.W.Th. Schotborgh.

Un palabra di gratitut ta bai na tur ku a partisipá ku di un òf otro forma ku a kontribuí na e buki i Ministerio di ESKD ta keda gradesido na e proyekto pa motibu ku di e forma aki nos ta stimulá skibimentu i lesamentu di nos alumnonan di skolnan di fundeshi di forma positivo.

—

KOMUNIKASHON

MAS NOTISIA

Ministerio konserní: Enseñansa, Siensia, Kultura & Deporte