Publiká riba 09 Febrüari 2020
Willemstad – Djasabra 8 di febrüari e ministerionan di SOAW i MEO konhuntamente ku CHATA a organisá un dia di Inskripshon pa desempleadonan i esnan ku tin trabou pero ta interesá pa solisitá pa un trabou den e sektor di Hospitalidat. E dia di inskripshon aki a tuma lugá na Universidat ICUC na Otrabanda di 9’or di mainta pa 2’or di atardi, kaminda esnan interesá por a inskribí pa un trabou den kuater área di trabou.
Pa medio di un mensahe via WhatsApp SOAW a invitá e diferente buskadónan di trabou registrá pa a partisipá na un dia di inskripshon menshoná pa 4 disiplina di trabou den e sektor di Hospitalidat. Ta trata di e disiplinanan; Asistente di servisio (Bediening assistent), asistente di kushina (Keuken assistent), seguridat (Security) i trabou doméstiko (Housekeeping).
Un kantidat relativamente grandi di mas ku 100 desempleado a asistí na e dia di inskripshon. Di e kantidat ku a asistí, 57 a keda selekshoná pa wòrdu entrevistá dor di 11 empresa ku a duna di konosé di tin mester di trahadó den e disiplinanan menshoná. Esnan ku a keda selektá ta repartí den e siguiente forma: 7 asistente di siguridat, 10 asistente di servisio, 22 asistente di kushina i 18 trahadó doméstiko.
Invitadonan wardando pa nan sigui e promé parti di un seshon kompartí den 3 fragmento na ICUC.
E grupo ku a keda selektá lo wòrdu entrevista pa un mínimo di 11 empresa. E grupo aki lo kuminsá aki tres siman ku nan preparashon di 1 luna di teoria i despues lo wòrdu posishoná den e empresanan ku a skohe nan durante e entrevistá. Pa 5 luna nan lo laborá i lo risibí un salario. Na momentu di optené nan sertifikado, e grupo aki ta garantisá di por sigui traha pa un mínimo di 6 luna mas.
E grupo di 57 lo ta e di dos grupo ku lo kuminsá den e trayekto klá pa turismo, banda di e grupo di 38 ku dia 22 di yanüari último a keda repartí den 2 disiplina. E promé ta pa asistente di kushina anto un grupo di asistente di servisio. Den e siman benidero e grupo aki (grupo di 38) ta wòrdu repartí bou di e empresanan ku a skohe nan durante di entrevista pa laborá den e próksimo 5 lunanan ku ta sigui, risibiendo un salario.
Ministernan di SOAW i MEO hañando resultadio preliminar di entrevistanan.
Mirando e interes ku tin bou di negoshinan den e sektor di Hospitalidat pero tambe bou di desempleadonan, e Minister di Desaroyo Ekonómiko, konhuntamente ku e Minister di Desaroyo Sosial Labor i Bienestar, huntu ku CHATA, a planea pa den e simannan ku ta sigui organisá un dia di inskripshon pa desempleadonan ku ta inskribí na SOAW den área di Bándabou pero tambe den un bario na Bándariba pa asina duna mas desempleadonan den a barionan menshoná un oportunidat pa trabou den e sektor di Hospitalidat.
E próksimo dia di inskripshon lo ta dia 15 di febrüari 2020 na Bándabou. Ministerio di SOAW lo manda un invitashon pa medio di WhatsApp pa tur esnan den e grupo di WhatsApp riba e nr +5999 510 7629, pero tambe otro medionan sosial pa tur desempleadonan di Bándabou por tuma nota di e dianan di inskripshon i akudí si nan ta interesá. Tur persona ku a yega di inskribí ku no a haña konfirmashon via WhatsApp i òf no tin e number wardá den nan smartphone, kòrda añadí +599 9 510 7629 den nan kontaktonan i spera un invitashon. Esaki ta di sumo importansia pa buskadónan di trabou.
Minister di Desaroyo Sosial Labor i Bienestar señor H. Koeiman i tambe Minister di Desaroyo Ekonómiko señora G. Mc William kier yama tur esnan ku a duna un aporte pa por a realisá e dia di inskripshon di djasabra último, masha danki pa nan kontribushon.
E tim kompleto di personanan ku a traha na e re-enkuentro ku personanan registrá pa trabou.
