Publiká riba 19 Yanüari 2026
Willemstad – Ministerio di Desaroyo Sosial, Labor & Bienestar (SOAW) ta informá públiko ku ta eksperensiá problemanan tékniko na momentu ku entregá petishon pa asistensia sosial (ònderstant) lo siguiente. Esaki ta konta solamente pa e prosedura online pa petishon di ònderstant.
Kas di Bario ta den e proseso pa mehorá su servisionan digital (un upgrade) di moda ku e kliente tin akseso na mas produkto i servisio di SOAW di forma digital. Ku e mehorashon aki, e ministerio SOAW kier sostené komunidat mihó. E servisio ta bira mas aksesibel, ta digitalisá mas produkto online i hasiendo esaki e servisio ta bira mas fásil pa bo komo kliente. E propósito ta pa esaki drenta na vigor entrante 1 di mart 2026.
Debí na e trabounan ya menshoná pa mehorá e servisio, no ta posibel pa hasi petishonnan online aktualmente, pero ministerio SOAW a krea e posibilidat pa hasi petishon personalmente na Kas di Bario. Esaki ta tuma lugá for di djaluna 19 di yanüari, 2026 te ku 28 di febrüari 2026, di 8:00 am pa 11:00 am.
Ministerio SOAW ta pidi diskulpa pa e inkumbiniensia i ta konsehá tur kliente pa keda informá bo mes mediante di e kanalnan ofisial di SOAW, inkluyendo e website di gobièrnu i medionan sosial. Asina e produktonan nobo ta aksesibel online, SOAW lo komuniká esaki.
Pa pregunta urgente òf emergensia, kliente por tuma kontakto ku su Kas di Bario.
