Publiká riba 03 Aprel 2026
WILLEMSTAD – Riba 31 di mart 2026, Ministerio di Desaroyo Sosial, Labor i Bienestar (SOAW) a organisá un konferensia na Renaissance Hotel bou di e título “Partner pa un Kòrsou Resiliente”. Durante e evento aki, e Maneho di Supsidio nobo i e Programa di Eksigensia (Programa van Eisen) ku ta kompañ’é a keda presentá ofisialmente na e institutonan supsidiá dor di e ministerio.
Partner pa un Kòrsou resiliente
E konferensia ta resultado di lunanan di kolaborashon intensivo i estrecho entre funshonarionan di ministerio i Sira Consulting (Hulanda). Minister di SOAW, Sra. America-Francisca, a enfatisá den su diskurso na apertura ku e institutonan supsidiá ta partnernan esensial pa un Kòrsou resiliente. E maneho nobo ta sirbi komo e fundeshi pa un koperashon estrecho – deskribí pa e minister komo un ‘matrimonio’ – entre Gobièrnu y e resipientenan di supsidio di SOAW. E ophetivo prinsipal di e polítika aki ta pa pèrkurá pa e rekursonan disponibel keda usá mas efisiente y efektivo pa e kuido, denter di e kuadronan finansiero disponibel y kualitativo.
Presentashon di e Sektornan
Tur Fundashon presente tabatin e oportunidat pa interkambiá ku e tres sektornan núkleo di e ministerio. Kada sektor a presentá su própio ekspektativanan spesífiko pa loke ta trata e kriterionan di kalidat komo parti di e Programa di Eksigensia (PvE):
Sektor di Desaroyo Sosial (SO):
A presentá puntonan spesífiko di e PvE pa loke ta trata kuido sosial.
Sektor di Labor:
A splika e kriterionan relevante pa e merkado laboral.
Sektor di Famia i Hubentut (F&J):
A atendé e kriterionan pa sostené famia i hóbennan.
Lider di e proyekto señora Landeline Concepcion
A para ketu na e kurason di e maneho. E maneho ta para pa mehorashon y kalidat di kuido i un futuro sostenibel. Ministerio di SOAW ta boga pa entre otro famianan i hubentut fuerte, oportunidatnan igual den merkado laboral, un posishon digno pa hende grandi, koheshon sosial i forsa própio, i un ret di seguridat sosial fuerte.
Ademas di e presentashonnan ariba menshoná, Peter Bex i Arthur Izeboud di Sira Consulting a duna un splikashon tékniko di e desaroyo di e maneho i e Programa di Eksigensia (PvE).
Kriterio i Diálogo Realístiko
Durante e konferensia, e Minister a demostrá di ta bon konsiente di e skarsedat di rekurso i e peso grandi di trabou den e area sosial i di kuido. E minister a kontinuá bisando ku e eksigensianan mester ta realístiko i ta kuadra ku e realidat di nos isla i e kapasidat di e organisashonnan. “No tin sentido pa pidi serunan di oro si nos ta ofresé solamente un pan ku keshi”. P’esei, nos lo hiba un diálogo ku otro. Pa asina nos por mira huntu kon nos por hasi e plannan faktibel.
Finalmente minister a hasi un yamada serio na tur partner pa enfoká riba loke ta uni nos: e amor pa Kòrsou i e kuido pa su habitantenan i pa nos realisá e ambishon aki huntu; nos pueblo meresé esáki! Minister a gradisi su ministerio, e fundashonnan, Peter Bex i Arthur Izeboud i tur persona ku a aportá na e trayekto aki ku nos por a selebrá un punto importante mas den e trayekto.
E konferensia a konkluí ku un seshon interaktivo di pregunta i kontesta “Town Hall” i un diskurso di klousura di e Sekretario-General Interino di e Ministerio di SOAW.
