Publiká riba 30 Yüli 2025
Willemstad – resientemente Sra. Analidia Adamus-Willems a rekordá i selebrá e echo ku 45 aña pasa ela drenta servisio di gobièrnu na prizòn. Sra. Analidia Adamus-Willems miho konosi komo Annie ta e trahadó ku mas aña di servisio na prizòn i ta e úniko dama na Kòrsou ku a hasi e funshon ku e ta ehersé aktualmente den e instituto di SDKK.
Sra. Analidia Adamus-Willems a kuminsá su karera na prizòn den departamentu atministrativo komo Schrijver i despues a traha den atministrashon di detenido pa hopi aña i aktualmente ta hefe interino di departamentu Intake/ Bevolking Administratie di SDKK.
Den un seremonia festivo i ameno na prizòn, personal di SDKK, famianan i demas invitado a selebrá huntu ku sra. Analidia Adamus- Willems e logro grandi den su karera laboral.
Na e okashon di e sermonia a hiba palabra direktor suplente sr. Anthony Hasselmeijer ku na su turno a hasi entrega di e sertifikadó di rekonosementu ( Oorkonde) di 45 aña di servisio na sra. Analidia Adamus-Willems i tambe un opsekio di parti Gerensia i personal di SDKK. Tambe na e okashon aki tabata tei presente representantenan di Kabinèt di Minister di Hustisia sr. Shalten Hato ku a hasi un entrega di un bunita opsekio na nòmber di Minister di Hustisia.
Gerensia i personal di SDKK ta deseá sra. Analidia Adamus- Willems tur klase di éksito i ku e sigui hasi e bon trabou manera semper ku dedikashon i amor na tur ku e ta sirbi diariamente.
