Notisia

Honor na sra. Margaret Boyé ku ta baha ku un penshon bon meresí.

WILLEMSTAD – Kabes di skol Marieta Alberto (ZMLK) sra. Margaret Boyé a baha ku penshon bon meresí. E skol a tene un tremendo mainta na honor di sra. Margaret Boyé den presensia di famia, minister di Enseñansa, Siensia, Kultura i Deporte sr. Sithree van Heydoorn, koleganan dosente, alumno, invitado i mas dignatario di enseñansa.

Durante di e aktividat kaminda a homenagiá e kabes di skol Minister sr. S. van Heydoorn, Funshonario di skolnan spesial sra. V. Coster, Inspektor – General di Enseñansa sr. R. Goedgedrag, Eks – inspektor di Enseñansa sra. G. Faber a tene un bunita diskurso. Kolega dosente a presentá e trayekto di e kabes di skol i alumnonan di vários grupo tur a tene bunita presentashon na honor di nan kabes di skol stimá.

Por mira bèk riba un mainta hopi emoshonal i bunita organisá pa e kabes di skol interino sra. Milang i su tim. Nan a gradisí sra. Margaret Boyé di kurashon huntu ku tur e alumnonan. A la bes minister enkargá ku enseñansa sr. S.van Heydoorn a hasi entrega di un bunita regalu i yama danki na tur ku ta traha na e skol pero ku un gratitut i apresio espesial na sra. Margaret Boyé.

—
KOMUNIKASHON
**riba e potrètnan athunto por tuma nota di e aktividat na honor di sra. Margaret Boyé ku a baha ku su penshon bon meresí.

MAS NOTISIA

Ministerio konserní: Enseñansa, Siensia, Kultura & Deporte