Publiká riba 17 Òktober 2024
WILLEMSTAD – For di djárason último, 16 di òktober, sr. Maharo Isenia (45) a bai liderá temporalmente e organisashon di “Shared Service Organization” (SSO) di Gobièrnu di Kòrsou. SSO ta konsistí di seis departamento – kada un ku nan hefe – i ku mas o ménos 250 empleado públiko. Ta trata aki di e servisionan di IT helpdesk, servisio di fasilidat, servisio di kompra sentral, atministrashon di salario, atministrashon di personal i maneho di dokumento (archivo). Aparte di tin e tarea pa liderá SSO, señor Isenia ta forma parti tambe di e grupo di kordinashon (stuurgroep) ku ta enkargá ku digitalisashon di Gobièrnu di Kòrsou.
SSO ta forma parti di e Ministerio di Maneho di Gobernashon, Planifikashon i Servisio Públiko (mihó konosí komo BPD) ku ta enkabesá pa Minister Hato. Pa Minister Hato ta sumamente nesesario pa atendé ku e retrasonan atministrativo ku tin den Gobièrnu i tambe pa digitalisá. Ke men durante e periodo ku señor Isenia ta na SSO por spera ku ta bai traha pa sigui profeshonalisá, alsa efisiensia i optimalisá Gobièrnu su atministrashonnan dor di krea maneho i proseduranan nobo i moderno ku ta kumpli ku lei. Aparte di esaki, lo start ku trayektonan pa yega na un transformashon digital den SSO sin ku ningun personal mester keda afektá negativamente. Tur esaki ku un tim ku ta bai kana e kaminda di optimalisashon.
Sr. Isenia ta konosí komo direktor di e departamento di komunikashon di Gobièrnu di Kòrsou. Durante su periodo einan, a pèrkurá pa transformá e departamento di komunikashon den un organisashon ful profeshonalisá ku ekspertonan di komunikashon kualifiká. Ademas, a digitalisá e departamento kompleto pa asina fasilitá komunidat i prensa ku informashon – espesialmente durante e periodo di pandemia. Aparte di su estudio di ingenieria i komunikashon, señor Isenia a finalisá e estudio di Masters in Business Administration (MBA) tambe.
Sra. Reyeanne Goilo lo liderá e departamento di komunikashon di Gobièrnu durante señor Isenia su ousiensia i por spera ku e departamento lo sigui funshoná den e mésun óptima forma.
