Ta firma 29 eksonerashon pa ekspanshon temporal di kapasidat di taksi
Publiká riba
09 Febrüari 2026
Willemstad – Minister Charles Cooper huntu ku Servisio pa Tráfiko i Transporte (UOVV) ta informá komunidat ku 29 eksonerashon pa ekspanshon temporal di kapasidat di taksi a wòrdú firmá ofisialmente. Durante e siman aki, tur e dokumentonan lo wòrdú entregá na e personanan konserní.
Ku e eksonerashonnan aki, UOVV ta duna un aporte konkreto pa oumentá e kantidat di taksista legal den sirkulashon durante e temporada haltu. Na mes momentu, e medida ta representá un sosten importante pa e shòfúrnan ousiliar, ku awor lo tin un trabou garantisá pa e próksimo tres lunanan.
Ekspanshon temporal i kontrolá:
Manera a wòrdu anunsiá, Minister Cooper ta hasi uso di su outoridat komo Minister di VVRP pa implementá un medida temporal i kontrolá, ku e meta pa atendé ku e preshon di demanda di transporte durante e temporada haltu di turismo.
E propósito di e medida aki ta respondé na e oumento di demanda, sin mester realisá un ekspanshon struktural di e kantidat di pèrmitnan di taksi, konsiderando ku e lei nobo pa esaki aún ta den proseso di preparashon.
Kondishonnan kla i karakter temporal:
E dispensashonnan otorgá tin un karakter públiko, eksepshonal i striktamente temporal.
E siguiente kondishonnan ta aplikabel:
• E shòfùr ousiliar mester ta registrá riba e lista ofisial di espera pa taksi;
• Mester kumpli ku tur rekisitonan segun artíkulo 12 di e Ordenansa Insular di Transporte di Persona;
• E dispensashon ta bálido pa un periodo limitá, ku ta korespondé ku e temporada haltu ofisialmente determiná.
E dispensashon no ta otorgá ningun derecho permanente ni ta ligá na un titular spesífiko di pèrmit. Tampoko, no ta kreá ningun ekspektativa legal pa un pèrmit definitivo den futuro.
Enfoke riba supervishon i kontrol:
Minister Cooper i UOVV ta enfatisá ku, pareu ku e ekspanshon temporal, e parti di kòntròl lo bira un prioridat. Den e tempu binidero, lo intensifiká kòntròl pa asina garantisá un sektor mas ordená, efektivo i ku ta operá den kuadro di lei.
Den kaso di violashon di e kondishonnan imponé, Minister por retirá e dispensashon mesora.
Pa mas informashon, por tuma kontakto ku Ofisina di Transporte Públiko via WhatsApp na +599 9 527 8244 òf via e-mail: tp.uovv@gobiernu.cw.
