Ta kita 136 opheto di propaganda butá sin pèrmit
Publiká riba
19 Yanüari 2026
Willemstad – Projectteam Toezicht en Handhaving (PTH) a kita varios opheto di propaganda riba 19 di yanuari 2026 parti mainta.
PTH a kita bòrchinan di propaganda pegá riba propiedat di gobièrnu, palunan di lus di kaya, i na òf riba rotònde. Esakinan ta kuminsando for di rotònde na Janwe te ku rotònde na Caracasbaai. Ponementu di opheto na mobilario públiko no ta pèrmití, pues no por pega nada na palunan di lus di kaya, den òf na un rotònde, bòrchi di tráfiko, ets.
E bòrchinan aki a keda butá ilegalmente, sin ku e pèrmit pa esaki ta reglá. Na tur, PTH a kita 136 bòrchi di propaganda for di riba henter e ruta menshoná.
