Publiká riba 07 Mart 2025
WILLEMSTAD – Riba djadumingu, 9 di mart 2025, temporada #5 di e podcast ofisial di Gobièrnu di Kòrsou “Ki Bo Ke Men?” ta kuminsá. Tur siman lo bai tin un episodio nobo i por sintonisá esaki tur djadumingu pa 7:30’or di anochi via kanalnan ofisial di Gobièrnu di Kòrsou i Telecuraçao. Via Televishon Direct e podcast lo pasa tur djadumingu pa 6:30 PM.
Na mart 2023, Gobièrnu di Kòrsou a introdusí su podcast ofisial “Ki Bo Ke Men?”, ku e meta pa di un forma inovativo sigui informá komunidat riba vários tópikonan importante pa pais. E podcast ta un produkshon di Direktorado di Komunikashon i Informashon i ta enserá un kòmbersashon habrí entre un presentadó i dos invitado. Invitadonan den e podcast “Ki Bo Ke Men?” por ta un minister, un kolega ámtenar versá riba e materia spesífiko i/òf un eksperto. Durante kada episodio ta trata un tópiko spesífiko relashoná ku asuntunan gubernamental. Esaki por ta un tópiko ‘al kaso’ na e momento ei, aspektonan di servisio na públiko, un kampaña informativo di Gobièrnu òf un ministerio, pero e por ta tambe simplemente un tópiko di relevansia pa gobièrnu i nos komunidat.
Temporada #5 ta introdusí un presentadó nobo ku ta Christopher de Wind. Christopher ta un ámtenar ku a kuminsá laborá for di 2014 pa Ministerio di Enseñansa, Siensia, Kultura i Deporte komo trahadó sosial den e Servisio pa Skolnan Públiko (DOS). Na aña 2020 el a bai traha den e Departamento di Prevenshon den Ministerio di Desaroyo Sosial, Labor i Bienestar (SOAW). Aktualmente Christopher ta ehersé e funshon di ‘Hoofd Bedrijfsvoering’ den e sektor Famia i Hubentut na Ministerio di SOAW.
Gobièrnu di Kòrsou ta kere den krea plataformanan kaminda e ámtenar por desaroyá mas di su talentonan, banda di su kresementu profeshonal i personal. Esaki ta yuda pa nos kompartí mas di nos trabounan komo empleado públiko i mustra ken ta e ámtenarnan ku ta traha pa pais Kòrsou. Alabes esaki ta yuda pa Gobièrnu yega aun mas serka di kada siudadano ku ta forma parti di nos komunidat.
Un invitashon ta bai pa komunidat pa sintonisá Gobièrnu di Kòrsou su kanal ofisial “Gob.” (kanal 84) riba FLOW, pa mas informashon i produkshonnan oudiovisual. Tambe por sigui Gobièrnu di Kòrsou online via Facebook, Instagram i Youtube òf djòin Gobièrnu di Kòrsou su Whatsapp Channel via e siguiente link: https://whatsapp.com/channel/0029Va8ZkiL297520tBsAy15
