Notisia

Willemstad – Minister Charles Cooper huntu ku Servisio pa Obra Públiko (OW) ta informá ku entrante djadumingu 21 di yanüari 2024 lo kuminsá ku trabounan di mantenshon riba partinan di Dr. Maalweg, pa despues kontinuá ku Seru Loraweg.

Debí na mal estado di e kaminda nan aki, OW lo bai hasi trabounan di mantenshon pa drecha esaki. Esaki ta enserá ku lo bai tin trabounan di asfaltamentu. Lo bai raspa (frees) sierto partinan ku ta den mal estado pa kita e kapa, i pone un kapa nobo di asfalt. Ta skohe pa e estilo konosí komo ‘reparatievakken’ mirando ku di e forma aki,  ta spar fondonan pa drecha muchu mas tantu kaya na Kòrsou. Un parti di un kaya ku ta bon i por bai un par di aña mas, no tin nodi di drecha e parti ei. Esaki ta habri espasio finansiero pa asfaltá mas kaya ku tambe ta den hopi mal estado.

E trabounan aki lo tuma lugá durante oranan di anochi. Esaki ta teniendo kuenta ku e fluho di vehíkulonan motorisá ku ta hasi uzo di e karetera aki durante di dia, i e parti di seguridat. Lo traha for di e lusnan di tráfiko na e krusada ku Caracasbaaiweg, te na Dr. Martin Luther King Boulevard.

E kareteranan lo wòrdú sera durante ehekutashon di e trabounan aki. Lo tin bòrchi i barinan ku lo guia e outomobilistananpa por hasi uzo di ruta alternativo pa por yega na nan destinashon.

Tambe Servisio pa Obra Públiko(OW) ta informa ku e trabou aki lo tin durashon di 2 siman. Kontratista Curaçaose Wegenbouw (CWM) lo bai ta esun enkargá pa ehersé e trabou aki. Orarionan di trabou lo ta di 8pm pa 5am

Ta hasi un apelashon na tur outomobilista pa kore ku koutela.