Publiká riba 04 Òktober 2017
Willemstad – Djasabra 7 di òktober i djadumingu 8 di òktober, Servisio pa Obra Públiko (OW) ta bai hasi trabounan di reparashon na e ‘vangrail’ di e viadukto ku ta keda riba e via ora di baha Koningin Julianabrug direkshon pa bai Domi òf Otrabanda. Esaki ta nesesario pa drecha e heru ku a frusa, i e trabounan aki ta forma parti di e mantenshon di e viadukto.
E trabounan ta trese kuné ku durante di e dos dianan menshoná, for di 7’or di mainta lo sera un via di tráfiko pa por hasi e trabounan di mantenshon. E otro via lo keda normal habri pa tráfiko. Pues tráfiko ku ta subi brùg pa bai direkshon di Domi òf Otrabanda lo haña un tiki di inkombeniensha.
OW i Betonbouw ta purba baha e molèster pa tráfiko i ta pidi pa tene kuenta ku e kambio temporal den e situashon di tráfiko. Tambe pa tene kuenta ku e personanan ku ta hasi e trabounan di reparashon na e ‘vangrail’. Pa kualke pregunta tokante e proyekto por tuma kontakto ku OW via e number 433-4327, Whats app +5999511-8582 òf via di e-mail info.vvrp@gobiernu.cw.
