Publiká riba 10 Aprel 2024
Willemstad – Servisio pa Obra Públiko (OW) ta informá ku entrante djaluna 15 di aprel, lo hasi sierto trabounan pa alsá seguridat di tráfiko na bògt dilanti Mangusa Rio Canario riba Schottegatweg Noord.
Manera ta konosí, e bògt aki ta unu peligroso, i awor atraves di infrastruktura ta bai atendé esaki. Lo usa un sistema titulá ‘super elevation’. E sistema aki ta enserá ku ta hasi un parti di e kaya mas elevá. Esaki ta pa evitá ku vehíkulonan ta pèrdè kontròl fasilmente, i ta hasi e maneho di vehíkulo mas fásil. E idea tras di ‘super elavation’ ta pa usa gravedat na bo fabor, enbes di lucha kontra dje.
Kontratista CWM ta enkargá ku ehekushon di e proyekto aki, i trabounan lo tumá lugá for di 8or di mainta te ku 3.30or di atardi, lo tin un durashon di 4 siman.
Durante ehekushon di e trabounan aki, lo tin desviashon di tráfiko. Ta pidi tur outomobilista pa kore ku koutela i ta gradisí adelantá pa e komprenshon i pasenshi.
