Publiká riba 07 Mart 2024
Enseñansa di Kòrsou pa lei ta basá riba desaroyo integral, inkluso personal, di kada alumno. Ta pa e motibu aki ta traha riba 7 area di edukashon, di moda ku na final di enseñansa, e hóben ta keda formá integral pa por funshoná riba i haña konekshon ku merkado laboral. Apesar ku lei ta duna e posibilidat pa regulá atmishon na Enseñansa HAVO pa via di un prueba o investigashon, lei ta stipulá ku tur mucha por haña akseso na Enseñansa avansá VSBO pa medio di e rapòrt edukashonal. E rapòrt edukashonal aki mester duna un bista integral di e desaroyo di e alumno durante henter su karera den enseñansa di fundeshi, a base di kua e kabes di skol por saka un konseho tokante kua tipo di enseñansa ta rekomendabel pa e alumno. Esaki por duna un bista konfiabel di e kapasidat di e alumno, pa e por ta eksitoso den su karera den Enseñansa avansá.
Parti di e proseso pa yega na e transishon basá riba desaroyo integral di e alumno di enseñansa di fundeshi aki ta enserá entre otro mehorashon di e rapòrt edukashonal, mehorá abilidat pa yena e rapòrt aki na un forma mas obhetivo posibel, mehorá konosementu di e tiponan di enseñansa den skol avansá i mehorá e abilidat pa formulá un konseho. E kaminda di preparashon aki naturalmente ta tuma su tempu, pero huntu ku direktivanan di skol a palabrá ku lo inisiá e trayekto aki.
Ta bon pa keda subrayá ku akseso na Enseñansa avansá ta i ta keda un kapasidat i responsabilidat di direktivanan di skol ku tin skol avansá. Pa te na e momentu ku yega na un rapòrt edukashonal konfiabel ku ta reflehá e kapasidat real di e alumno i un konseho ku ta mas serka di e realidat, ta sigui enkaminá e proseso aki den estrecho kolaborashon ku direktivanan di skol. Tambe ta bon pa indiká ku e proseso di desishon aki ta kana paralelo ku e resultadonan di investigashon i análisis ku e unidat di data i análisis di Ministerio di Enseñansa, Siensia, Kultura i Deporte ta hasi riba e tema importante aki. Esaki den e afan pa tur paso di e maneho keda realisá a base di dato i investigashon.
Pa fin di aprel pues EFO ta kontinuá en todo kaso pa tur alumno den grupo 8. Pa mas informashon tokante esaki mayornan por akudí na nan respektivo kabesnan di skol. Seshonnan di informashon ta kuminsá pronto. Keda pendiente pa un rueda di prensa den kua Minister ta duna mas informashon tokante e transishon aki.
Minister di Enseñansa, Siensia, Kultura i Deporte sr. Sithree van Heydoorn ta deseá tur alumno, mayor, i tambe nos personal di enseñansa hopi éksito pa e periodo di prueba i èksamen ku ta na kaminda.
—
KOMUNIKASHON
