WILLEMSTAD – E trayekto di Integrashon Responsabel ku a inisiá na luna di mart 2021 ta yegando su final. Meta di e trayekto akí ta pa personanan ku a drenta Kòrsou di forma legal promé ku 13 di mart 2020 pero pa motibu di COVID-19 no por a regresá nan pais di orígen i aserka ta kumpli ku sierto kriterio stipulá, por legalisá nan estadia na Kòrsou.
E último fecha pa registrá pa Integrashon Responsabel ta 31 di desèmber próksimo. Debí na hopi petishon ku a risibí te ku awor akí a surgi un retraso den registrashon di e petishonnan. E retraso akí a pone ku hopi persona ku ya a hasi petishon no a risibí nan komprobante – e asina yamá kopia kliente – ainda. E kontesta outomátiko ku e personanan ku a apliká ta risibí na momentu ku entregá e petishon, ta sirbi komo komprobante te na momentu ku risibí esun ofisial.
Servisio di Atmishon kier a enfatisá ku pa apliká pa Integrashon Responsabel e persona mester a drenta Kòrsou di forma legal promé ku 13 di mart 2020. Nos ke hasi un yamada na e personanan ku ta bin na remarke pa Integrashon Responsabel pa hasi esaki mas pronto posibel. Pa por apliká mester hasi esaki via di e wèpsait www.immigrationcur.org. Riba e wèpsait menshoná por haña tur informashon pa por hasi petishon.
