Willemstad – Durante 4 dia nos a mira karanan kontentu i gradesido di vários di nos muchanan ta bandoná e aktividat di Back to School – SDKK Barbershop. Esaki despues ku sea nan a keda bunita peña òf pela pa kuminsá e aña eskolar nobo. Primeramente e proyekto aki, tabata destiná pa yunan di kliente di prizòn, hóbennan di JJIC, Internat i tambe skolnan i muchanan di bario di Koralspecht. Pero mirando tantu reakshon positivo a habri esaki pa pueblo di Kòrsou.
E meta di e proyekto akí, tabata pa duna bèk na komunidat i tambe ta parti di un trayekto di resosialisashon. Mas ku 100 mucha a haña oportunidat di keda pelá i tambe peñá pa medio di nos klientenan di SDKK. Mas aleu pa ku e proyekto akí, nos a haña gran koperashon i sosten di Ministerio di Hustisia, KPC, Brandweer Kòrsou i The Agent Barbershop.
Finalmente Gerensia di SDKK na nòmber di nos klientenan ta gradisí komunidat kompleto pa e bon reakshon risibí pa ku e proyekto di Back to School- SDKK Barbershop tambe Minister di Hustisia sr.Shalten Hato ku su tim pa e aporte duna na e proyekto aki.
