Publiká riba 19 Mart 2024
Más di 25 embahadó a yega Kòrsou djadumingu 17 di mart último, pa un konferensha pa embahadónan ku yama “Curaçao Experience Ambassador Edition 2024”. E konferensha ta enfoká riba fortifikashon di relashonnan internashonal. El a kuminsá djaluna 18 di mart i djárason 20 di mart ta e último dia di e evento akí.
Durante e konferensha e partisipantenan ta eksplorá e posibilidatnan pa realisá mas koperashon ku otro. Entretantu a duna djaluna atenshon kaba na entre otro: energia renobabel, agrikultura i komèrsio. Tambe tópikonan manera transpòrt, protekshon di medio ambiente, turismo, kuido di salú, edukashon i kultura ta bin dilanti .
Bishita di trabou di e delegashon na ‘Blue Nap Americas’
Banda di atendé diferente presentashon, e delegashon a hasi bishita di trabou na diferente sitio i entidatnan. Por ehèmpel riba djamars nan a bishitá Freezone (Curinde) den kuadro di e régimen di belasting, i den konteksto di Kòrsou komo e hub digital den region, nan a bishitá Blue Nap Americas. Esaki ta un lugá ku ta funshoná komo un punto di konekshon internashonal pa diferente aktividat digital.
Mañan ta e último dia di e Curaçao Experience Ambassador Edition 2024. Riba agènda tin e.o.: strategia nashonal di eksportashon, seguridat, kultura i turismo. Despues di e konferensha e grupo ta sigui eksplorá e oportunidatnan ku ‘Curaçao Experience’ ta brinda den un esfera ameno.
