Publiká riba 24 Òktober 2024
WILLEMSTAD – Dia 22 di oktòber, Promé Minister di Kòrsou, Su Ekselensia Gilmar Pisas, a organisá un lùnch spesial pa yama bon biní den kuadro di e bishita ofishal di Presidente di Repúblika di Sürnam, Su Ekselensia Chandrikapersad “Chan” Santokhi. Den su diskurso, Promé Minister a pone énfasis riba e lasonan históriko i di amistat fuerte entre Kòrsou i Sürnam, i a ekspresá su apresio pa e kolaborashon fertil ku tin riba diferente área manera komèrsio, hustisia i impuesto.
Den retrospektiva, Promé Minister Pisas a para ketu riba e kolaborashon ku a bin ta krese desde nan promé enkuentro na aña 2022 i e pasonan importante ku a tuma durante di e bishita akí. Entre otro, e dos paisnan a firma un akuerdo, esta un ‘raamwerkovereenkomst’, pa negosiashonnan bilateral pa sigui fortifiká e kolaborashon ekonómiko. Tambe el a yama danki pa e sosten ku Sürnam a duna den afiliashon di Kòrsou komo miembro asosiá di CARICOM.
E bishita ofishal di e Presidente surinameño a terminá dia 23 di òktober 2024, di e forma akí profundisando mas ainda e relashonnan mutuo i poniendo e fundeshi pa kolaborashonnan den futuro. E bishita akí ta marka un fase nobo di kolaborashon i rèspèt mutuo entre ámbos pais.
Klek aki pa e diskurso kompletu (na hulandes) di Promé Minister Pisas.
