Un dushi ambiente di biba pa nos grandinan ta esensial
Publiká riba
01 Yüni 2024
Willemstad – Riba djabièrnè 31 di mei, Minister Charles Cooper a hasi un bishita na Kas Zuster Modesta na Penstraat 31 i Huize Puerto Rico na Berg Altena 59. Ámbos sitio ta kasnan pa nos hende grandinan. E bishita a tuma lugá huntu ku Fundashon Kas Popular (FKP) kaminda Minister Cooper por a tuma nota di kon FKP a drecha e edifisionan aki. Nan tabata den mal estado i pa aña 2024 Minister Cooper a fiha un maneho pa drecha komplehonan di nos hende grandinan.
Durante e bishita por a tuma nota kua ta tur e trabounan ku a keda ehersé. E personanan tabata sumamente kontentu ku Minister Cooper huntu ku FKP a logra drecha e edifisionan aki kual awor nan por gosa di un ambiente muchu mas sano i dushi pa biba aden.
Manera ya anunsiá, Minister Cooper huntu ku FKP a pone man na obra pa kuminsá ku un plan di mantenshon pa kasnan sosial di Gobièrnu. Tur habitantenan di kasnan sosial di Gobièrnu mester por biba den un kas bunita di paden i bunita di pafó.
FKP ta manehá un gran kantidat di kas i edifisionan sosial na nòmber di gobièrnu, i ta risibí bastante ‘melding’ diariamente ku petishon pa mantenshon na e kas. FKP na su turno ta kategorisá esakinan a base di prioridat i ta trata pa mas pronto posibel, solushoná e petishonnan. Pues ta un maneho di e departamentu di mantenshon di FKP pa den 48 ora trata na resolvé problema urgente. FKP a informá minister di e desaroyo aki, i ta hasi lo máksimo pa kumpli.
Pronto FKP i Minister Cooper lo duna informashon di tur e barionan ku ta na bùrt pa haña mantenshon di nan kas. P’esei ta importante pa tur habitante dje kasnan aki aktualisá nan datonan personal na ofisina di FKP. Por yama na number +5999 4326000 ku ta tambe FKP su number diwhatsapp, ku ta disponibel bou di orarionan di ofisina.
Den e plan di mantenshon di kasnan di Gobièrnu, kasnan ku tin mas tantu tempu ta warda riba mantenshon i kasnan den estado físiko hopi deplorabel ta bai haña preferensia.
Keda na altura di tur desaroyo via di medionan sosial di Minister Cooper, FKP, i VVRP
