Notisia

Willemstad- riba 4 di mei Gobièrnu di Kòrsou a otorgá e Premio Cola Debrot na Adriano Cesáreo Jean Luis pa su aporte artistiko i edukativo den e ramo di baile.

Premio Cola Debrot a keda otorgá pa promé biaha na 1968, i a kontinuá anualmente. Pues tin mas ku 50 aña ku Gobièrnu ta duna rekonosimentu na personanan ku ta hasi trabou meritorio i yuda edifiká pais. Premio Cola Debrot konosé diferente kategoria ku ta ser premiá: arkitektura, arte visual, baile, folklor, literatura, músika, teater i siensia. 

E aña aki, e Aña di Ka’i Orgel, a toka turno na e kategoria di ekspreshon artistiko di “baile”.

Konseho Kultural Kòrsou despues di a hasi su trabou investigativo, a proponé pa e premio ser otorgá na sr. Adriano Cesáreo Jean Louis. Kabinete Rhuggenaath ta yama sr. Jean Luis i su famia masha pabien. I ta yama alabes danki pa yuda i guia un gran parti di nos komunidat pa ekspresá nan mes pa medio di baile. Ekspreshon den su generalidat i ekspreshon artistiko ta importante pa desaroyo di un hende.

P’esei ta importante pa para ketu na e siguiente palabranan:

Emoshonnan no ekspresá, nunka ta muri!
Nan ta keda biba te ora nan mira lus di dia! 4 di mei tabatá un di e dianan!

********************************************

MAS NOTISIA

Ministerio konserní: Enseñansa, Siensia, Kultura & Deporte