Publiká riba 07 Desèmber 2018
WILLEMSTAD – Despues di alrededor 3 luna ku un total di 30 partisipante a sigui diferente kursonan, djabièrnè último nan a risibí nan sertifikado di partisipashon na e proyekto “Ekonomia ta den nos mes man”. Esaki ta un proyekto di ministerio di desaroyo ekonómiko (MEO) den kolaborashon ku ministerio di desaroyo sosial, labor i bienestar (SOAW) den kuadro di Programa di Urgensia. Promé Minister, sr. Eugene Rhuggenaath, minister di MEO, sr. Steven Martina, i minister di SOAW, sr. Hensley Koeiman, a entregá e sertifikado na e partisipantenan.
E partisipantenan tabata di barionan di Barber i Montaña i tur partisipante ku a kuminsá ku e proyekto a finalisá esaki ku éksito. Durante e 10 seshonnan, e partisipantenan a siña diferente tópiko, entre otro impuesto, atministrashon, aspektonan hurídiko i merkadeo. Esaki ta den kuadro di empoderá e habitante di bario pa formalisá su ideanan di tin su propio negoshi.
“Ekonomia ta den nos Mes Man” ta un proyekto ku a inisiá den ministerio di desaroyo ekonómiko, sektor empresarial i sektor di desaroyo ekonómiko i inovashon, pa stimulá e (mikro)empresario den bario. E grupo di enfoke ta personanan ku ta kana ku idea di habri un negoshi òf ku ya ta hasiendo un ke otro negoshi di un forma informal kaba. E meta di e proyekto aki ta pa kapasitá empresarionan pa nan registrá, formalisá i desaroyá nan negoshi propio. Di e manera aki tambe lo kombatí pobresa, baha desempleo (bou di hóbennan) i duna impulso na nos ekonomia.
Den kuadro di Programa di Urgensia, pa mehorá kalidat di bida den bario, ya a implementá e proyekto aki den barionan di Otrobanda i Buena Vista i kursistanan diariamente ta hinka den praktiká loke ku nan a siña durante e lèsnan.
Palabranan di felisitashon ta bai na tur e kursistanan i éksito ku e plannan pa formalisá boso negoshi.Athunto algun potrèt di e entrega di sertifikado di e proyekto “Ekonomia ta den nos mes man” di bario di Barber i Montaña.
Athunto algun potrèt di e entrega di sertifikado di e proyekto “Ekonomia ta den nos mes man” di bario di Barber i Montaña.
